ന്യൂഡൽഹി: ക്യാൻസർ ഉൾപ്പെടെയുള്ള ജീവൻരക്ഷാ മരുന്നുകളുടെ വ്യാപാര ലാഭവിഹിതം 30 ശതമാനമായി നിജപ്പെടുത്താൻ കേന്ദ്ര സർക്കാർ ഒരുങ്ങുന്നു. സുപ്രീംകോടതിയുടെ കടുത്ത വിമർശനത്തിന് പിന്നാലെയാണ് വിതരണക്കാർക്ക് നൽകുന്ന തുകയ്ക്ക് മുകളിലുള്ള വ്യാപാര മാർജിൻ പരിമിതപ്പെടുത്താൻ നടപടി തുടങ്ങിയത്. പുതിയ നിയന്ത്രണം പ്രാബല്യത്തിൽ വരുന്നതോടെ വിപണിയിൽ ജീവൻരക്ഷാ മരുന്നുകൾക്ക് 70 ശതമാനം വരെ വില കുറയാൻ സാധ്യതയുണ്ട്.

പേറ്റന്റുള്ളതും ഉയർന്ന വിലയുള്ളതുമായ ജീവൻരക്ഷാ മരുന്നുകളെ ഉൾപ്പെടുത്തിയാണ് വിപണിയിലെ അമിത ലാഭവിഹിതത്തിന് തടയിടാൻ സർക്കാർ ലക്ഷ്യമിടുന്നത്. 2019-ൽ 42 ക്യാൻസർ മരുന്നുകളുടെ വ്യാപാര മാർജിൻ പരിമിതപ്പെടുത്തി നടപ്പാക്കിയ പൈലറ്റ് പദ്ധതിയുടെ തുടർച്ചയായാണ് ഈ വിപുലമായ നടപടി.