ന്യൂഡൽഹി: രാജ്യത്ത് 543 ബ്രാൻഡുകളിലും പാക്കറ്റുകളിലുമുള്ള കാൻസർ മരുന്നുകളുടെ പരമാവധി വിൽപനവില (എംആർപി) നാഷണൽ ഫാർമസ്യൂട്ടിക്കൽ പ്രൈസിങ് അതോറിറ്റി (എൻപിപിഎ) വെട്ടിച്ചുരുക്കി. പട്ടികയിൽ ഉൾപ്പെടാത്ത (നോൺ-ഷെഡ്യൂൾഡ്) 137 അർബുദ മരുന്നുകളുടെ ട്രേഡ് മാർജിൻ 30 ശതമാനമായി പരിമിതപ്പെടുത്തിയതിനെത്തുടർന്ന് നവംബർ ഒൻപത് മുതൽ പുതിയ നിരക്കുകൾ പ്രാബല്യത്തിൽ വരും. ഇതോടെ ചില മരുന്നുകൾക്ക് 90 ശതമാനത്തിലേറെ വിലക്കുറവ് ലഭിക്കുമെങ്കിലും, വൻകിട കമ്പനികളുടെ വിലപിടിപ്പുള്ള പല ജീവൻരക്ഷാ മരുന്നുകളും ഇപ്പോഴും നിയന്ത്രണ പരിധിക്ക് പുറത്താണ്.
ചില പ്രത്യേക സ്തനാർബുദ ചികിത്സയ്ക്കുള്ള പാൽബോസിക്ലിബിന്റെ (Palbociclib) ഒരു ബ്രാൻഡിന്റെ വില 40,421 രൂപയിൽ നിന്ന് 2,720 രൂപയായും, കീമോതെറാപ്പി മരുന്നായ തയോടെപയുടെ (Thiotepa) വയൽ ഒന്നിന് 80,072 രൂപയിൽ നിന്ന് 7,150 രൂപയായും കുത്തനെ ഇടിഞ്ഞു. ദസാറ്റിനിബ് (Dasatinib), ലെൻവാറ്റിനിബ് (Lenvatinib), അബിററ്ററോൺ (Abiraterone), ഒലാപാരിബ് (Olaparib) എന്നീ മരുന്നുകളുടെ നിരക്കുകളിലും വലിയ ഇളവുണ്ട്. എന്നാൽ, 21-ലധികം കാൻസറുകൾക്ക് ഉപയോഗിക്കുന്ന പെംബ്രോലിസുമാബ് അടങ്ങിയ കീട്രൂഡയുടെ (Keytruda) വില മാറ്റമില്ലാതെ 2,16,500 രൂപയിലും സ്തനാർബുദ മരുന്നായ റിബോസിക്ലിബിന്റെ (Kryxana) വില 24,435 രൂപയിലും തുടരുകയാണ്; താഗ്രിസ്സോ, ടെസെൻട്രിക്, ദർസാലെക്സ്, ഇംഫിൻസി തുടങ്ങിയ മുൻനിര ഒറിജിനേറ്റർ ബ്രാൻഡുകൾക്കും വില കുറച്ചിട്ടില്ല.
ആശുപത്രികൾ നടത്തിവന്ന വലിയ ചൂഷണമാണ് പുതുക്കിയ പട്ടികയിലൂടെ പുറത്തുവന്നതെന്നും ഇതിന്റെ പ്രയോജനം രോഗികൾക്ക് ഉടനടി ലഭ്യമാക്കണമെന്നും തേർഡ് വേൾഡ് നെറ്റ്‌വർക്കിലെ ലീഗൽ റിസർച്ചർ കെ.എം. ഗോപകുമാർ പ്രതികരിച്ചു. വിലകൂടിയ പ്രധാന മരുന്നുകളുടെ ലഭ്യത ഉറപ്പാക്കാൻ പേറ്റന്റുകൾ മറികടന്ന് ജനറിക് ഉൽപ്പാദനത്തിന് അനുമതി നൽകുന്ന 'കംപൾസറി ലൈസൻസിങ്' പോലുള്ള മാർഗ്ഗങ്ങൾ സർക്കാർ തേടണമെന്നും അദ്ദേഹം ചൂണ്ടിക്കാട്ടി. രാജ്യത്തെ നോൺ-ഷെഡ്യൂൾഡ് മരുന്നുകൾക്കെല്ലാം ട്രേഡ് മാർജിൻ പരിധി നിശ്ചയിക്കുന്ന കാര്യത്തിൽ സുപ്രീം കോടതിയുടെ ഉത്തരവ് വരാനിരിക്കെയാണ് വിലനിയന്ത്രണ നടപടികൾ.
