ഗുവാഹത്തി: വ്യായാമം ചെയ്യുന്നതിനിടെ ജിമ്മിൽ കുഴഞ്ഞുവീണ് മെഡിക്കൽ കോളേജ് ഡോക്ടർ മരണപ്പെട്ടു. അസമിലെ നഗാവിലാണ് നാടിനെ നടുക്കിയ ഈ സംഭവം ഉണ്ടായത്. നാഗാവ് മെഡിക്കൽ കോളേജിലെ പ്രൊഫസറായ ഡോ. സഹിൻ റഹ്മാൻ (47) ആണ് അന്തരിച്ചത്. ഓഗസ്റ്റ് 27-ന് രാത്രി 7.39-ഓടെയായിരുന്നു അപകടം. ജിമ്മിൽ വർക്ക്ഔട്ട് ചെയ്തുകൊണ്ടിരിക്കെ അദ്ദേഹം പെട്ടെന്ന് ബോധരഹിതനായി താഴേക്ക് വീഴുന്നതിന്റെ സി.സി.ടി.വി ദൃശ്യങ്ങൾ പുറത്തുവന്നിട്ടുണ്ട്.
അപകടം സംഭവിച്ച ഉടൻതന്നെ അദ്ദേഹത്തെ സമീപത്തെ ആശുപത്രിയിലേക്ക് എത്തിച്ചെങ്കിലും ജീവൻ രക്ഷിക്കാനായില്ല. മരണത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. ജിമ്മുകളിൽ കായികാഭ്യാസങ്ങൾക്കിടയിൽ കുഴഞ്ഞുവീണുള്ള മരണങ്ങൾ വർദ്ധിച്ചുവരുന്ന പശ്ചാത്തലത്തിലാണ് മറ്റൊരു ജീവൻ കൂടി നഷ്ടമായിരിക്കുന്നത്. കഴിഞ്ഞ ജൂൺ മാസത്തിൽ ഉത്തരാഖണ്ഡിലെ ചമ്പാവത്ത് ജില്ലയിലും സമാനമായ സംഭവം അരങ്ങേറിയിരുന്നു; ജിമ്മിൽ വ്യായാമം ചെയ്യുന്നതിനിടെ 38 വയസ്സുള്ള സ്പെഷ്യൽ ഓപ്പറേഷൻസ് ഗ്രൂപ്പ് ഉദ്യോഗസ്ഥൻ കുഴഞ്ഞുവീണ് മരിക്കുകയായിരുന്നു.
