മുംബൈ: വിവാഹനിശ്ചയം റദ്ദാക്കി ഒരു മാസത്തെ ഇടവേളയ്ക്ക് ശേഷം ഇന്ത്യൻ ക്രിക്കറ്റ് താരം പൃഥ്വി ഷായും നടിയും ഇൻഫ്ലുവെൻസറുമായ ആകൃതി അഗർവാളും വീണ്ടും ഒന്നിച്ചു. തിങ്കളാഴ്ച ഇൻസ്റ്റാഗ്രാമിലൂടെ ആകൃതി പങ്കുവെച്ച ഔദ്യോഗിക കുറിപ്പ് പൃഥ്വി ഷായും സ്വന്തം സ്റ്റോറിയിലൂടെ പങ്കുവെച്ചതോടെയാണ് ഇരുവരും ഒന്നിച്ച വിവരം സ്ഥിരീകരിച്ചത്.
തങ്ങളുടെ ബന്ധത്തെക്കുറിച്ച് അടുത്ത ആളുകൾ ഉണ്ടാക്കിയ തെറ്റിദ്ധാരണകളും പറഞ്ഞ അഭിപ്രായങ്ങളും കേട്ടാണ് മുൻപ് വിവാഹനിശ്ചയം പിൻവലിക്കാൻ തീരുമാനിച്ചതെന്ന് ആകൃതി കുറിപ്പിൽ വ്യക്തമാക്കി. മറ്റുള്ളവരുടെ വാക്ക് വിശ്വസിച്ച് എടുത്ത ആ തീരുമാനത്തിന്റെയും അതിന്റെ പേരിൽ ഉണ്ടായ ബുദ്ധിമുട്ടുകളുടെയും പൂർണ്ണ ഉത്തരവാദിത്തം താൻ ഏറ്റെടുക്കുന്നതായും അവർ കുറിച്ചു.
തുടർന്ന് ഇരുവരും പരസ്പരം തുറന്നു സംസാരിക്കുകയും പരസ്പര ധാരണയിലെത്തുകയും ചെയ്തതോടെയാണ് ബന്ധം പുനരാരംഭിക്കാൻ തീരുമാനിച്ചതെന്നും പ്രസ്താവനയിൽ പറയുന്നു.
