കൊച്ചി: ഗിരീഷ് എ.ഡി സംവിധാനം ചെയ്ത 'ബെത്ലഹേം കുടുംബ യൂണിറ്റ്' തിയേറ്ററുകളിൽ മികച്ച പ്രേക്ഷകപ്രതികരണം നേടി മുന്നേറുകയാണ്. ചിത്രത്തിലെ നിവിൻ പോളിയുടെയും മമിത ബൈജുവിന്റെയും അഭിനയം വലിയ തോതിൽ പ്രശംസിക്കപ്പെടുന്നുണ്ട്. ചിത്രത്തിലെ ഏറെ ശ്രദ്ധിക്കപ്പെട്ട നിവിന്റെ വൈകാരികമായ കരച്ചിൽ രംഗത്തെക്കുറിച്ച് ക്യൂ സ്റ്റുഡിയോയ്ക്ക് നൽകിയ അഭിമുഖത്തിൽ സംവിധായകൻ ഗിരീഷ് എ.ഡി മനസ്സ് തുറന്നു. തിരക്കഥയിൽ കഥാപാത്രം "കരയണം" എന്ന് മാത്രമാണ് രേഖപ്പെടുത്തിയിരുന്നതെന്നും, എന്നാൽ ആ രംഗം പ്രേക്ഷകരുടെ മനസ്സ് ഇത്രയധികം കീഴടക്കുമെന്ന് ചിത്രീകരണ വേളയിൽ കരുതിയിരുന്നില്ലെന്നും അദ്ദേഹം വ്യക്തമാക്കി.
കഥാപാത്രം കരയണം എന്ന് മാത്രമായിരുന്നു സ്ക്രിപ്റ്റിൽ ഉണ്ടായിരുന്നത്; എങ്ങനെ ചെയ്യണമെന്ന് നിർദ്ദേശങ്ങൾ നൽകിയിരുന്നില്ല. 'ചേട്ടാ കരഞ്ഞാൽ പോരെ, ജസ്റ്റ് കരഞ്ഞാൽ പോരെ' എന്ന് നിവിൻ ചോദിച്ചപ്പോൾ 'കരയൂ, നമുക്ക് നോക്കാം' എന്നാണ് മറുപടി നൽകിയത്. നിവിൻ പോളി തികച്ചും സ്വന്തം ശൈലിയിലാണ് ആ രംഗം അഭിനയിച്ചു ഫലിപ്പിച്ചത്. ചിത്രീകരണം പൂർത്തിയായപ്പോഴാണ് ആ പ്രകടനം എത്രത്തോളം ഗംഭീരമായിട്ടുണ്ടെന്ന് വ്യക്തമായതെന്നും ഗിരീഷ് പറഞ്ഞു.
രംഗങ്ങൾ എഡിറ്റ് ചെയ്ത് പശ്ചാത്തല സംഗീതം കൂടി ചേർത്തപ്പോഴാണ് ആ രംഗത്തിന്റെ യഥാർത്ഥ തീവ്രത ബോധ്യപ്പെട്ടത്. ആ ഫ്രെയിമുകളിൽ രണ്ടുപേരെയും പ്രത്യേകമായി ഫോക്കസ് ചെയ്തത് കാണാൻ വളരെ മികച്ചതായിരുന്നുവെന്നും, അത് സ്ക്രീനിൽ കാണുമ്പോൾ നിവിന്റെ കരച്ചിലിന് വല്ലാത്തൊരു വൈകാരിക അനുഭൂതി ലഭിക്കുന്നുണ്ടെന്നും സംവിധായകൻ കൂട്ടിച്ചേർത്തു. ഷൂട്ടിംഗ് വേളയിൽ ഒരു രംഗം പ്രേക്ഷകരിൽ എത്രത്തോളം സ്വാധീനം ചെലുത്തുമെന്ന് എപ്പോഴും മുൻകൂട്ടി കാണാൻ കഴിയില്ലെന്നതാണ് സിനിമയുടെ പ്രത്യേകത.
ഷൂട്ട് ചെയ്യുന്ന ഘട്ടത്തിൽ അതിന്റെ പൂർണ്ണമായ ആഴം പലപ്പോഴും അനുഭവപ്പെടാറില്ലെന്നും, പിന്നീട് ദൃശ്യങ്ങൾ ഒരുമിച്ചുവരുമ്പോഴാണ് അതിന്റെ ഫീൽ തിരിച്ചറിയാനാകുന്നതെന്നും അദ്ദേഹം പറഞ്ഞു. ചിത്രീകരണത്തിനിടയിൽ തമാശകൾ ഫലിക്കുമെന്ന് ചിലപ്പോൾ മനസ്സിലാക്കാൻ സാധിക്കുമെങ്കിലും വൈകാരിക രംഗങ്ങളുടെ വ്യാപ്തി അപ്പോൾ വ്യക്തമാകില്ല. പല ദിവസങ്ങളിലായി വ്യത്യസ്ത ഷോട്ടുകൾ എടുക്കുന്നതിനാൽ സെറ്റിൽ വെച്ച് അതിന്റെ മുഴുവൻ സ്വാധീനവും തിരിച്ചറിയാൻ പ്രയാസമാണ്. മറ്റ് സാധാരണ രംഗങ്ങൾ ഷൂട്ട് ചെയ്യുന്നതുപോലെ വളരെ സ്വാഭാവികമായാണ് നിവിന്റെ ഈ വൈകാരിക രംഗവും ചിത്രീകരിച്ചതെന്ന് ഗിരീഷ് എ.ഡി വിശദീകരിച്ചു.
