തരുൺ മൂർത്തിയുടെ സംവിധാനത്തിൽ മോഹൻലാൽ പ്രധാനകഥാപാത്രത്തെ അവതരിപ്പിക്കുന്ന ‘അതിമനോഹരം’ എന്ന ചലച്ചിത്രത്തിന്റെ ചിത്രീകരണം നിലയ്ക്കലിൽ ആരംഭിച്ചു. റാന്നി ഫോറസ്റ്റ് ഡിവിഷന് കീഴിലാണ് നിലവിൽ ചിത്രീകരണം പുരോഗമിക്കുന്നത്. സിനിമയുടെ രണ്ടാം ഘട്ട ഷെഡ്യൂൾ ശബരിമലയിൽ ചിത്രീകരിക്കാനാണ് നേരത്തെ തീരുമാനിച്ചിരുന്നത്. പെരിയാർ ടൈഗർ റിസർവ് പരിധിയിൽ ചിത്രീകരണത്തിന് അനുമതി നിഷേധിക്കപ്പെട്ടപ്പോൾ, നിലയ്ക്കൽ ബസ് സ്റ്റാൻഡ്, പമ്പ തുടങ്ങിയ ഭാഗങ്ങളിൽ ഷൂട്ടിംഗ് നടത്താൻ റാന്നി ഡി.എഫ്.ഒ അനുമതി നൽകുകയായിരുന്നു.
ശബരിമല സന്നിധാനത്ത് ചിത്രീകരണം നടത്തുന്നതിന് തിരുവിതാംകൂർ ദേവസ്വം ബോർഡിന്റെ ഭാഗത്തുനിന്ന് യാതൊരു എതിർപ്പുമില്ലെന്ന് പ്രസിഡന്റ് കെ. ജയകുമാർ വ്യക്തമാക്കി. ബോർഡ് അനുമതി നൽകുമ്പോഴും വനംവകുപ്പിന്റെ അനുമതി അനിവാര്യമാണെന്ന് വ്യക്തമാക്കിയിരുന്നുവെന്നും പെരിയാർ ടൈഗർ റിസർവിന്റെ അനുമതി ആവശ്യമാണെങ്കിലും അവർ ഇതുവരെ അത് അനുവദിച്ചിട്ടില്ലെന്നും അദ്ദേഹം കൂട്ടിച്ചേർത്തു. അതേസമയം, മോഹൻലാൽ പോലീസ് ഉദ്യോഗസ്ഥന്റെ വേഷത്തിലെത്തി അയ്യപ്പഭക്തരെ കടത്തിവിടുന്ന രംഗങ്ങളാണ് ഇന്ന് നിലയ്ക്കലിൽ പ്രധാനമായും ചിത്രീകരിച്ചത്.
