മുംബൈ: ഹോളിവുഡ് സൂപ്പർതാരം ടോം ക്രൂസിന് തന്നോട് പ്രത്യേക ഇഷ്ടം (ക്രഷ്) ഉണ്ടെന്ന വെളിപ്പെടുത്തലുമായി ബോളിവുഡ് നടി മല്ലിക ഷെറാവത്ത്. ഹിന്ദിക്ക് പുറമെ തെന്നിന്ത്യൻ സിനിമകളിലും സജീവ സാന്നിധ്യമായി മാറിയ താരം തന്റെ ഗ്ലാമറസ് വേഷങ്ങളിലൂടെയാണ് ശ്രദ്ധേയയായത്. ഏപ്രിൽ 13-ന് സംപ്രേഷണം ആരംഭിക്കുന്ന 'ദി ട്രെയിറ്റേഴ്സ്' റിയാലിറ്റി ഷോയുടെ രണ്ടാം സീസണിൽ മത്സരാർത്ഥിയായി എത്തുന്ന മല്ലിക, പ്രസ്തുത ഷോയുടെ പ്രൊമോ വീഡിയോയിലാണ് ഇക്കാര്യം തുറന്നുപറഞ്ഞത്.
തനിക്ക് ആരോടും ക്രഷ് തോന്നിയിട്ടില്ലെങ്കിലും ഒരുപാട് പേർക്ക് തന്നോട് ഇഷ്ടം തോന്നിയിട്ടുണ്ടെന്ന് മല്ലിക വ്യക്തമാക്കി. ടോം ക്രൂസിനും തന്നോട് പ്രണയമാണെന്നും താൻ കള്ളം പറയുകയല്ലെന്നും പറഞ്ഞ നടി, കൈവശം ഫോണുണ്ടായിരുന്നെങ്കിൽ അദ്ദേഹത്തിന്റെ വീഡിയോ കാണിച്ച് തരുമായിരുന്നുവെന്നും കൂട്ടിച്ചേർത്തു. ടോം ക്രൂസ് വളരെ നല്ലൊരു വ്യക്തിയാണെന്നും തങ്ങൾ ഒന്നിച്ച് പാർട്ടികളിൽ പങ്കെടുത്തിട്ടുണ്ടെന്നും, അത്തരം ഒത്തുചേരലുകളുടെ വീഡിയോകൾ ടോം ക്രൂസ് തനിക്ക് അയച്ചു തരാറുണ്ടെന്നും അവർ പറഞ്ഞു.
മല്ലികയുടെ ഈ വെളിപ്പെടുത്തൽ സോഷ്യൽ മീഡിയയിൽ വലിയ ചർച്ചകൾക്കാണ് വഴിവെച്ചിരിക്കുന്നത്. കേൾക്കുമ്പോൾ തമാശയായി തോന്നാമെങ്കിലും താരം പറയുന്നത് സത്യമായിരിക്കാമെന്ന് ഒരു വിഭാഗം വാദിക്കുന്നു. പ്രിയങ്ക ചോപ്രയ്ക്കും മുൻപ് ഹോളിവുഡിൽ സാന്നിധ്യം ഉറപ്പിക്കുകയും കൈയടി നേടുകയും ചെയ്ത നടിയാണ് മല്ലികയെന്ന് ചിലർ ചൂണ്ടിക്കാണിക്കുന്നുണ്ട്. അതേസമയം, നടി കള്ളം പറയുകയാണെന്ന് പരിഹസിച്ചുകൊണ്ടും നിരവധി പേർ രംഗത്തെത്തുന്നുണ്ട്.
