ചെന്നൈ: സംവിധായകൻ എന്ന നിലയിൽ പ്രേക്ഷകരെ ത്രില്ലടിപ്പിച്ച നിരവധി ഹിറ്റുകൾ സമ്മാനിച്ച ലോകേഷ് കനകരാജ്, നായകനായുള്ള അരങ്ങേറ്റ ചിത്രത്തിലൂടെയും ശ്രദ്ധനേടുന്നു. അദ്ദേഹത്തെ കേന്ദ്രകഥാപാത്രമാക്കി അരുൺ മാതേശ്വരൻ ഒരുക്കിയ 'ഡിസി' എന്ന സിനിമയ്ക്ക് തിയേറ്ററുകളിൽ നിന്നും മികച്ച അഭിപ്രായമാണ് ലഭിക്കുന്നത്. ലോകേഷിനൊപ്പം നായികാവേഷം കൈകാര്യം ചെയ്ത വാമിഖയുടെ പ്രകടനവും വലിയ രീതിയിൽ പ്രശംസിക്കപ്പെടുന്നുണ്ട്.

ഇപ്പോഴിതാ ലൊക്കേഷനിൽ വെച്ച് വാമിഖയുമായുണ്ടായ ഹൃദ്യമായ അനുഭവം പങ്കുവെക്കുകയാണ് നടൻ ജവഹർ ശക്തി. സാധാരണയായി മുൻനിര നായികമാർ ചെറിയ സഹതാരങ്ങളോട് ചിരിക്കാൻ പോലും മടികാണിക്കാറുണ്ടെന്നും എന്നാൽ വാമിഖ അതിൽ നിന്നൊക്കെ തികച്ചും വ്യത്യസ്തയാണെന്നും 'ദി ന്യൂ ഇന്ത്യൻ എക്സ്പ്രസിന്' നൽകിയ അഭിമുഖത്തിൽ അദ്ദേഹം വ്യക്തമാക്കി. തന്റെ കയ്യിലിരുന്ന തകരാറിലായ ഫോൺ കണ്ട് നടി തനിക്ക് ഐഫോൺ 17 പ്രോ മാക്സ് സമ്മാനമായി നൽകിയതിനെക്കുറിച്ചും അദ്ദേഹം വെളിപ്പെടുത്തി.

സാധാരണയായി വലിയ നായികമാർ തങ്ങളെപ്പോലുള്ള ചെറിയ വേഷങ്ങൾ ചെയ്യുന്നവരെ കണ്ടാൽ ചിരിക്കാറുപോലുമില്ലെന്നും, അഞ്ചോ ആറോ ദിവസം ഒന്നിച്ചഭിനയിച്ചാൽ പോലും പിന്നീട് വഴിയിൽ വെച്ച് കണ്ടുമുട്ടിയാൽ അവഗണിച്ചു പോകുന്നവരാണ് പലരുമെന്നും ജവഹർ പറഞ്ഞു. എന്നാൽ വാമിഖ തുടക്കം മുതൽ തന്നെ നേരിട്ടെത്തി സൗഹൃദത്തോടെ വിശേഷങ്ങൾ അന്വേഷിക്കാറുണ്ടായിരുന്നു. എപ്പോഴും പുഞ്ചിരിയോടെ സുഖവിവരങ്ങൾ തിരക്കുന്ന പ്രകൃതമാണ് അവരുടേത്. സിനിമയിലെ ചന്ദ്ര എന്ന കഥാപാത്രത്തെപ്പോലെ തന്നെ കരുത്തുള്ളതും സ്നേഹസമ്പന്നവുമായ വ്യക്തിത്വമാണ് വാമിഖയ്ക്കുമുള്ളത്.

ചിത്രീകരണ സമയത്ത് തന്റെ കൈവശം വളരെ പഴയൊരു സാംസങ് ഫോണായിരുന്നു ഉണ്ടായിരുന്നത്. ഷൂട്ടിംഗ് അവസാന ഘട്ടത്തിലെത്തിയപ്പോൾ തന്നെ അരികിലേക്ക് വിളിച്ചുവരുത്തി വാമിഖ ഒരു ഐഫോൺ പ്രോ മാക്സ് സമ്മാനമായി നൽകുകയായിരുന്നുവെന്ന് താരം ഓർത്തെടുത്തു. തുടർന്ന് ഫോൺ സ്‌ക്രീൻ ഓൺ ചെയ്ത്, വാമിഖയുടെ കയ്യിൽ പനിനീർപ്പൂക്കളുമായി ഇരുവരും ഒന്നിച്ചുനിൽക്കുന്ന വാൾപേപ്പർ ചിത്രവും ജവഹർ ശക്തി അഭിമുഖത്തിനിടെ കാണിച്ചു.