ന്യൂഡൽഹി: നീറ്റ് പിജി 2026 പരീക്ഷകൾ ഓഗസ്റ്റ് 30-ന് നടത്തുമെന്ന് അധികൃതർ വ്യക്തമാക്കി. രാവിലെ ഒൻപത് മണി മുതൽ ഉച്ചയ്ക്ക് 12.30 വരെ ഒറ്റ ഷിഫ്റ്റിലായാണ് കമ്പ്യൂട്ടർ അധിഷ്ഠിത പരീക്ഷ നടക്കുക. പരീക്ഷാർത്ഥികൾക്കുള്ള അഡ്മിറ്റ് കാർഡുകൾ ഓഗസ്റ്റ് 25 മുതൽ എൻ.ബി.ഇ.എം.എസ് വെബ്‌സൈറ്റിലൂടെ ലഭ്യമാകും.

നേരത്തെ നിശ്ചയിച്ചിരുന്ന ഷെഡ്യൂൾ പ്രകാരം ഓഗസ്റ്റ് 27-ന് നൽകാനിരുന്ന അഡ്മിറ്റ് കാർഡുകൾ പിന്നീട് ഉദ്യോഗാർത്ഥികളുടെ സൗകര്യം മുൻനിർത്തി ഓഗസ്റ്റ് 24-ലേക്ക് മാറ്റിയെങ്കിലും, പുതുക്കിയ സമയക്രമമനുസരിച്ച് ഓഗസ്റ്റ് 25-നാണ് വിതരണം ആരംഭിക്കുന്നത്.

പരീക്ഷാ കേന്ദ്രങ്ങളുമായി ബന്ധപ്പെട്ട വിശദാംശങ്ങൾ ഓഗസ്റ്റ് 11-ന് തന്നെ പ്രസിദ്ധീകരിച്ചിട്ടുണ്ടെന്ന് എൻ.ബി.ഇ.എം.എസ് വ്യക്തമാക്കി. പരീക്ഷ, ഹാൾ ടിക്കറ്റ് എന്നിവ സംബന്ധിച്ച ആധികാരിക വിവരങ്ങൾക്കായി എൻ.ബി.ഇ.എം.എസിന്റെ ഔദ്യോഗിക പ്ലാറ്റ്‌ഫോമുകൾ മാത്രം പരിശോധിക്കണമെന്ന് ഉദ്യോഗാർത്ഥികൾക്ക് നിർദ്ദേശം നൽകിയിട്ടുണ്ട്.