വാഷിങ്ടൺ: എൻവിഡിയ മേധാവി ജെൻസൻ ഹുവാങ്ങുമായുള്ള വ്യക്തിപരമായ അടുപ്പം ഉപയോഗപ്പെടുത്തി 7.5 ബില്യൺ ഡോളറിലധികം വിലമതിക്കുന്ന എൻവിഡിയ എഐ ചിപ്പുകൾ ചൈനയിലേക്ക് കടത്തിയതായി റിപ്പോർട്ട്. ചൈനീസ് രഹസ്യാന്വേഷണ ഏജൻസിയായ മിനിസ്ട്രി ഓഫ് സ്റ്റേറ്റ് സെക്യൂരിറ്റിക്ക് (MSS) വേണ്ടി പ്രവർത്തിക്കുന്ന ചാരവനിതയെന്ന് യുഎസ് സർക്കാർ സംശയിക്കുന്ന ആലീസ് ഹുവാങ്ങാണ് 2023 മുതൽ അമേരിക്കയുടെ കയറ്റുമതി വിലക്ക് മറികടന്ന് ഏകദേശം 2,40,000 എച്ച്100, എച്ച്200 ചിപ്പുകൾ ചൈനയിലെത്തിക്കാൻ സഹായിച്ചത്.
അത്യാധുനിക എഐ പ്രൊസസറുകൾ ചൈനീസ് കമ്പനികൾക്ക് ലഭിക്കുന്നത് തടയാൻ അമേരിക്ക കർശന നിയന്ത്രണങ്ങൾ ഏർപ്പെടുത്തിയിരിക്കെയാണ് ആലീസും സഹോദരിയും ഭർത്താവും ചേർന്ന് ചൈനയിലും സിംഗപ്പൂരിലുമായി കമ്പനികളുടെ ശൃംഖല രൂപീകരിച്ച് ചിപ്പുകൾ സ്വന്തമാക്കിയത്. 2023 ജൂണിൽ സ്ഥാപിതമായ 'ഷാങ്ഹായ് സെഞ്ച്വറി ലിറ്റോങ്' എന്ന പ്രധാന സ്ഥാപനം, അതേ വർഷം ഒക്ടോബറിൽ എൻവിഡിയയുടെ മുൻഗണനാ ക്ലൗഡ് പങ്കാളികളുടെ പട്ടികയിൽ ഇടംനേടിയതിലൂടെ മുൻഗണനാടിസ്ഥാനത്തിൽ ചിപ്പുകൾ കരസ്ഥമാക്കുകയായിരുന്നു.
ഈ ശൃംഖല വഴി ഷാങ്ഹായ് സെഞ്ച്വറി ലിറ്റോങ് ഏകദേശം 7.5 ബില്യൺ ഡോളറിന്റെ ജിപിയുകൾ വാങ്ങിയതായാണ് കണക്കുകൾ വ്യക്തമാക്കുന്നത്. കൂടാതെ, 2023 മുതൽ 2025 വരെയുള്ള കാലയളവിൽ 'മെഗാസ്പീഡ്' വഴി ഏകദേശം 4.6 ബില്യൺ ഡോളറിന്റെയും, 'സ്പീഡ്മാട്രിക്‌സ്' എന്ന മറ്റൊരു കമ്പനി വഴി രണ്ട് ബില്യൺ ഡോളറിന്റെയും എഐ ചിപ്പുകൾ ഇറക്കുമതി ചെയ്തിട്ടുണ്ട്.
ജെൻസൻ ഹുവാങ്ങുമായുള്ള അടുപ്പമാണ് ഈ ചിപ്പുകൾ സ്വന്തമാക്കാൻ സഹായകമായതെന്നും, ഈ ബന്ധം ആലീസ് ഹുവാങ് പരസ്യമായി പ്രകടിപ്പിച്ചിരുന്നതായും റിപ്പോർട്ടിൽ പറയുന്നു. തന്റെ ജന്മദിനത്തിൽ ജെൻസൻ ഹുവാങ്ങിനൊപ്പം വിരുന്നിൽ പങ്കെടുക്കാറുണ്ടെന്നും അദ്ദേഹം സമ്മാനങ്ങൾ നൽകാറുണ്ടെന്നും ആലീസ് അവകാശപ്പെട്ടിരുന്നു.
