വാഷിങ്ടൺ: ഇറാനെതിരായ അമേരിക്കൻ സൈനിക നടപടികളെ എതിർക്കുന്നവർ ആത്മീയ അന്ധത ബാധിച്ചവരാണെന്ന ഇസ്രയേലിലെ യുഎസ് അംബാസഡർ മൈക്ക് ഹക്കബിയുടെ പ്രസ്താവന അന്താരാഷ്ട്ര തലത്തിൽ വലിയ വിവാദത്തിന് വഴിവെച്ചു. യുദ്ധത്തെ എതിർക്കുന്നവരുടെ ചിന്തകളെ സാത്താൻ അന്ധമാക്കുകയും ബുദ്ധിയെ കീഴടക്കുകയും ചെയ്തിരിക്കുകയാണെന്ന് 'ദി ആങ്കർ' പോഡ്‌കാസ്റ്റിൽ അമീർ സർഫാത്തിക്ക് നൽകിയ അഭിമുഖത്തിൽ അദ്ദേഹം അവകാശപ്പെട്ടു. ഒരു നയതന്ത്രജ്ഞൻ ഇത്തരത്തിൽ സംസാരിക്കുന്നത് വിചിത്രമായി തോന്നാമെങ്കിലും, ഇതിന് പിന്നിൽ ഭൗമരാഷ്ട്രീയത്തിനപ്പുറമുള്ള ആഴത്തിലുള്ള ആത്മീയ പ്രശ്നങ്ങളുണ്ടെന്നാണ് തന്റെ വിശ്വാസമെന്നും അദ്ദേഹം കൂട്ടിച്ചേർത്തു.
ഒക്ടോബർ 23-ന് 'ബിഹോൾഡ് ഇസ്രയേൽ' പുറത്തുവിട്ട അഭിമുഖത്തിലാണ് യുഎസ് സൈനിക നീക്കങ്ങളോടുള്ള യൂറോപ്യൻ രാജ്യങ്ങളുടെ സമീപനത്തെ ഹക്കബി രൂക്ഷമായി വിമർശിച്ചത്. ഇറാൻ ഉയർത്തുന്ന ഭീഷണിയെ പ്രതിരോധിക്കാനുള്ള അമേരിക്കയുടെ ഇടപെടലുകളെ സംശയത്തോടെ വീക്ഷിക്കുന്ന യൂറോപ്യൻ സർക്കാരുകളുടെ നിലപാട് ആത്മീയ-മാനസിക പ്രശ്നമാണെന്ന തരത്തിലാണ് അദ്ദേഹം പ്രതികരിച്ചത്.
അമേരിക്കയിലെ ബാപ്റ്റിസ്റ്റ് സഭയിൽ മുൻ പാസ്റ്ററായി സേവനമനുഷ്ഠിച്ചിട്ടുള്ള മൈക്ക് ഹക്കബി കടുത്ത ഇസ്രയേൽ അനുകൂലിയായാണ് അറിയപ്പെടുന്നത്. ഇറാനും ഇസ്രയേലും തമ്മിലുള്ള തർക്കത്തെ കേവല രാഷ്ട്രീയ പോരാട്ടമായി കാണാൻ കഴിയില്ലെന്നും, മറിച്ച് അത് വെളിച്ചവും ഇരുട്ടും തമ്മിലുള്ള ആത്മീയ യുദ്ധമാണെന്നും മുൻപും പരസ്യമായ ഇസ്രയേൽ അനുകൂല നിലപാടുകൾ സ്വീകരിച്ചിട്ടുള്ള ഹക്കബി വ്യക്തമാക്കി.
