ടെൽ അവീവ്: ഇസ്രയേൽ ജയിലുകളിൽ കഴിയുന്ന കുട്ടികൾ അടക്കമുള്ള പലസ്തീൻ തടവുകാരിൽ 80 ശതമാനത്തോളം പേരും സ്കേബീസ് (ത്വക്ക് രോഗം) ബാധിതരാണെന്ന് പലസ്തീനിയൻ പ്രിസണർ സൊസൈറ്റിയുടെ റിപ്പോർട്ട്. ഒക്ടോബറിലും നവംബർ ആദ്യവാരത്തിലുമായി ലീഗൽ ടീം ജയിലുകൾ സന്ദർശിച്ച വിവരങ്ങളുടെയും തടവുകാരുടെയും മുൻ തടവുകാരുടെയും സാക്ഷ്യങ്ങളുടെയും അടിസ്ഥാനത്തിലാണ് സംഘടന റിപ്പോർട്ട് പുറത്തുവിട്ടത്. അമിതമായ തിരക്കും വസ്ത്രക്ഷാമവും രോഗം വേഗത്തിൽ പടരുന്നതിന് കാരണമായെന്നും അധികൃതർ വൈദ്യസഹായം ബോധപൂർവ്വം നിഷേധിക്കുകയാണെന്നും സംഘടന കുറ്റപ്പെടുത്തി.
ഇസ്രയേൽ പ്രിസൺ സർവീസിന്റെ പ്രത്യേക വിഭാഗങ്ങൾ ആയുധങ്ങളും റബ്ബർ ബുള്ളറ്റുകളും നായ്ക്കളുമായി സെല്ലുകളിൽ തുടർച്ചയായി റെയ്ഡുകൾ നടത്തി ക്രൂരമായി ആക്രമിക്കാറുണ്ടെന്ന് തടവുകാർ വെളിപ്പെടുത്തി. ആക്രമണങ്ങളിൽ വാരിയെല്ലുകൾക്കും പല്ലുകൾക്കും കേടുപാടുകൾ സംഭവിക്കുന്നതും ഗുരുതര പരിക്കേൽക്കുന്നതും സാധാരണമാണ്; സന്ദർശന വഴികളിൽപ്പോലും മർദനമേൽക്കുന്നതിനാൽ ഭയം നിമിത്തം പേരുകളുടെ ചുരുക്കെഴുത്തുകളോടെയാണ് തടവുകാരുടെ വിവരങ്ങൾ സംഘടന പുറത്തുവിട്ടത്. ദക്ഷിണ ഇസ്രയേലിലെ നെഗേവ് ജയിലിൽ ഒക്ടോബർ 28-ന് നടന്ന റെയ്ഡിൽ ഗ്യാസ് പ്രയോഗത്തിലും റബ്ബർ ബുള്ളറ്റ് വെടിവെയ്പ്പിലും മൂന്ന് പേർക്ക് പരിക്കേൽക്കുകയും മറ്റൊരു തടവുകാരന്റെ പല്ലുകൾ തകരുകയും ചെയ്തിട്ടുണ്ട്; മറ്റൊരു തടവുകാരന് കൈയിലെ ഞരമ്പ് മുറിഞ്ഞ് ശസ്ത്രക്രിയ ആവശ്യമായി വന്നു. തടവുകാരെ നിലത്തിരുത്താൻ കിടക്കകൾ പകൽസമയത്ത് നീക്കം ചെയ്യുന്നത് അസ്ഥിരോഗമുള്ള പ്രായമായവരെ സാരമായി ബാധിക്കുന്നുണ്ട്.
ഉത്തര ഇസ്രയേലിലെ ദാമോൻ ജയിലിൽ കഴിയുന്ന വനിതാ തടവുകാരും കടുത്ത പീഡനങ്ങളും പരിശോധനകളുടെ പേരിലുള്ള ദുരുപയോഗവും നേരിടുന്നുണ്ട്. വസ്ത്രക്ഷാമവും തിരക്കും കാരണം തൊലിപ്പുറത്തെ തടിപ്പും ചൊറിച്ചിലും മൂലം ഇവർക്ക് ഉറങ്ങാൻ സാധിക്കുന്നില്ല; രോഗബാധ വെറും അലർജി മാത്രമാണെന്ന് പറഞ്ഞ് ജയിൽ അധികൃതർ ചികിത്സ നിഷേധിച്ചെങ്കിലും മോചിതരായ വനിതകളിൽ സ്കേബീസ് സ്ഥിരീകരിച്ചിരുന്നു. നിലവിൽ 90 സ്ത്രീകൾ ഉൾപ്പെടെ 9,300-ലധികം പലസ്തീനികൾ ഇസ്രയേൽ തടവറകളിലുണ്ടെന്നും, തടവുകാരെ ശാരീരികമായും മാനസികമായും തകർക്കാൻ നടത്തുന്ന ഇത്തരം കുറ്റകൃത്യങ്ങളിൽ അന്താരാഷ്ട്ര മനുഷ്യാവകാശ സംഘടനകൾ അടിയന്തരമായി ഇടപെടണമെന്നും പലസ്തീനിയൻ പ്രിസണർ സൊസൈറ്റി ആവശ്യപ്പെട്ടു.
