ടെഹ്‌റാൻ: വാഷിങ്‌ടണെ എക്കാലത്തെയും യുദ്ധങ്ങളിലേക്ക് വഞ്ചനാപരമായി വലിച്ചിഴയ്ക്കുന്ന ഇസ്രയേൽ നയത്തിൽ അമേരിക്കൻ ജനതയും പശ്ചിമേഷ്യൻ ജനവിഭാഗങ്ങളും ഒരുപോലെ മടുത്തുവെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി. ഭൂരിഭാഗം അമേരിക്കക്കാർക്കും ഇസ്രയേലിനോട് കടുത്ത അതൃപ്തിയുണ്ടെന്ന കാര്യം പ്രസിഡന്റ് ഡൊണാൾഡ് ട്രംപ് തിരിച്ചറിഞ്ഞിട്ടുണ്ടെങ്കിലും, ആ വികാരത്തിന് പിന്നിലെ യഥാർത്ഥ കാരണം മനസ്സിലാക്കുന്നതിൽ അദ്ദേഹത്തിന് ആശയക്കുഴപ്പമുണ്ടെന്ന് അരാഗ്ചി എക്സിൽ വ്യക്തമാക്കി.
സിബിഎസ് ന്യൂസിന്റെ '60 മിനിറ്റ്സ്' അഭിമുഖത്തിൽ ഡൊണാൾഡ് ട്രംപ് നടത്തിയ പരാമർശങ്ങൾക്ക് മറുപടിയായാണ് ഇറാന്റെ പ്രതികരണം. കഴിഞ്ഞയാഴ്ചത്തെ ഇടക്കാല തെരഞ്ഞെടുപ്പിൽ റിപ്പബ്ലിക്കൻ പാർട്ടി നേരിട്ട കനത്ത പരാജയത്തിന് കാരണം കുതിച്ചുയരുന്ന ഇന്ധനവിലയും, ഇറാനെതിരായ സൈനിക നീക്കത്തോടും ഇസ്രയേലിനോടുമുള്ള വോട്ടർമാരുടെ ശക്തമായ എതിർപ്പുമാണെന്ന് അഭിമുഖത്തിൽ ട്രംപ് സമ്മതിച്ചിരുന്നു.
രാഷ്ട്രീയപരമായ തിരിച്ചടികൾ തുറന്നുസമ്മതിക്കുമ്പോഴും ഇറാനെ ആക്രമിച്ച നടപടിയെ ട്രംപ് അഭിമുഖത്തിൽ ന്യായീകരിക്കുകയുണ്ടായി. വീണ്ടുമൊരു അവസരം ഉണ്ടായാലും ഇതേ തീരുമാനത്തിൽ ഉറച്ചുനിൽക്കുമെന്നും, യുദ്ധത്തിൽ അമേരിക്ക വിജയിച്ചതിനാൽ സമാധാന കരാറിലെത്താൻ ടെഹ്‌റാൻ സന്നദ്ധത പ്രകടിപ്പിക്കുന്നുണ്ടെന്നും ട്രംപ് അവകാശപ്പെട്ടിരുന്നു.
