വാഷിംഗ്ടൺ: ഇറാൻ യുദ്ധത്തിൽ അമേരിക്കൻ സൈനിക സംരക്ഷണം ഉറപ്പാക്കിയ ഇസ്രയേൽ ഉൾപ്പെടെയുള്ള സഖ്യകക്ഷികൾ മുഴുവൻ യുദ്ധച്ചെലവുകളും തിരികെ നൽകണമെന്ന് യുഎസ് പ്രസിഡന്റ് ഡൊണാൾഡ് ട്രംപ്. യുദ്ധത്തിന് വകയിരുത്തിയ വൻതുക ഈ രാജ്യങ്ങളിൽ നിന്ന് ഈടാക്കുമെന്നും, ഇക്കാര്യം ബന്ധപ്പെട്ട ഭരണകൂടങ്ങളെ ഔദ്യോഗികമായി അറിയിച്ചിട്ടുണ്ടെന്നും അദ്ദേഹം വ്യക്തമാക്കി. യുദ്ധച്ചെലവുകളെച്ചൊല്ലി അമേരിക്കയ്ക്കുള്ളിൽ രൂക്ഷവിമർശനങ്ങൾ നിലനിൽക്കെ, സിബിഎസ് ന്യൂസിന്റെ '60 മിനിറ്റ്സ്' പരിപാടിയിൽ മാധ്യമപ്രവർത്തകൻ റോസ് ഡൗത്താറ്റിന് നൽകിയ അഭിമുഖത്തിലാണ് ട്രംപിന്റെ പ്രതികരണം.
അമേരിക്കൻ സൈനിക ഇടപെടൽ ഉണ്ടായിരുന്നില്ലെങ്കിൽ ഇസ്രയേൽ എന്ന രാജ്യം ഇന്ന് നിലനിൽക്കില്ലായിരുന്നുവെന്ന് ട്രംപ് അവകാശപ്പെട്ടു. യുഎസ് ബി-2 ബോംബറുകൾ ഇറാന്റെ ആണവ കേന്ദ്രങ്ങൾക്ക് നേരെ നടത്തിയ ആക്രമണങ്ങളാണ് ഇസ്രയേലിനെ സംരക്ഷിച്ചതെന്നും, ആ പ്രഹരത്തിലൂടെ ഇറാന്റെ ആണവശേഷി പൂർണ്ണമായി തകർത്തുവെന്നും അദ്ദേഹം ആവർത്തിച്ചു.
ഹോർമുസ് കടലിടുക്കിലെ കപ്പൽ ഗതാഗതത്തിന് കാവൽ നിൽക്കുന്ന അമേരിക്കൻ സേനയെ പിൻവലിക്കുന്നതിനെക്കുറിച്ചുള്ള ചോദ്യത്തിന്, അത് വലിയ സാമ്പത്തിക ബാധ്യതയല്ലെന്നും പണം തിരികെ ലഭിക്കുമെന്നുമായിരുന്നു ട്രംപിന്റെ വിശദീകരണം. എന്നാൽ പണം തിരികെ നൽകുന്നത് സംബന്ധിച്ച ഔദ്യോഗിക കരാറുകളോ തെളിവുകളോ പുറത്തുവിടാൻ അദ്ദേഹം തയ്യാറായില്ല; ട്രംപിന്റെ പ്രസ്താവനയിൽ വൈറ്റ് ഹൗസ് ഇതുവരെ പ്രതികരണവും നടത്തിയിട്ടില്ല.
