ടെഹ്‌റൻ: തങ്ങളുടെ കൈവശമുള്ള സമ്പുഷ്ടീകരിച്ച ആണവ വസ്തുക്കൾ മറ്റൊരു രാജ്യത്തേക്ക് മാറ്റില്ലെന്നും ഈ ആവശ്യത്തിന് യാതൊരു ന്യായീകരണവുമില്ലെന്നും ഇറാൻ വ്യക്തമാക്കി. രാജ്യത്തുള്ള 60 ശതമാനം സമ്പുഷ്ടീകരിച്ച യുറേനിയം വിദേശത്തേക്ക് കൊണ്ടുപോകില്ലെന്ന നിലപാടിൽ ഭാവി ചർച്ചകളിലും വിട്ടുവീഴ്ചയുണ്ടാകില്ലെന്ന് ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഗായി അറിയിച്ചു. പ്രസ് ടിവിയാണ് ബഗായിയുടെ പ്രതികരണം ഉദ്ധരിച്ച് റിപ്പോർട്ട് ചെയ്തത്.

ഇറാനിലെ ആണവ കേന്ദ്രങ്ങൾക്ക് നേരെ അമേരിക്ക നിരന്തരം ഉയർത്തുന്ന ഭീഷണികളെയും ബഗായി രൂക്ഷമായി വിമർശിച്ചു. ഇത്തരം ഭീഷണികൾ നാശനഷ്ടം നേരിട്ട ആണവനിലയങ്ങളിൽ പരിശോധന നടത്തുന്നതിന്റെ അന്താരാഷ്ട്ര സാധുത തന്നെ ഇല്ലാതാക്കുകയാണെന്ന് അദ്ദേഹം പറഞ്ഞു. കേടുപാടുകൾ സംഭവിച്ച ആണവ കേന്ദ്രങ്ങളിൽ പരിശോധന നടത്താൻ അന്താരാഷ്ട്ര ആണവോർജ ഏജൻസിക്ക് (ഐഎഇഎ) പ്രത്യേക പ്രോട്ടോക്കോളോ സംവിധാനമോ നിലവിലില്ലെന്നും അദ്ദേഹം കൂട്ടിച്ചേർത്തു.

അതേസമയം, ഐഎഇഎയുമായുള്ള സഹകരണം രാജ്യം തുടരുന്നുണ്ടെന്ന് ലെബനൻ ആസ്ഥാനമായുള്ള അൽ മായദീൻ ചാനലിന് നൽകിയ അഭിമുഖത്തിൽ ബഗായി ചൂണ്ടിക്കാട്ടി. ഏജൻസിയുടെ പരിശോധനാ സംഘം പത്ത് ദിവസം മുൻപ് ബുഷെഹറിലെ ഏക ആണവനിലയം സന്ദർശിച്ചിരുന്നു.