മോണ്ടെവിഡിയോ: അർജന്റീന പ്രസിഡന്റ് ജാവിയർ മിലിയുടെ തീവ്ര സാമ്പത്തിക പരിഷ്കാരങ്ങൾ ജനദ്രോഹപരമാണെന്ന് ലിയോ പതിനാലാമൻ മാർപാപ്പ. സർക്കാർ നടപ്പാക്കുന്ന കടുത്ത ചെലവുചുരുക്കൽ നയങ്ങൾ സാധാരണക്കാരുടെ ജീവിതത്തെ പ്രതികൂലമായി ബാധിക്കുന്നുവെന്ന് അർജന്റീന സന്ദർശനത്തിനിടെ അദ്ദേഹം കുറ്റപ്പെടുത്തി. 1987-ൽ ജോൺ പോൾ രണ്ടാമൻ മാർപാപ്പ നടത്തിയ സന്ദർശനത്തിന് ശേഷം നാല് പതിറ്റാണ്ടിനിടെ ആദ്യമായാണ് ഒരു മാർപാപ്പ ലോകത്ത് ഏറ്റവും കൂടുതൽ കത്തോലിക്കരുള്ള അർജന്റീനയിലെത്തുന്നത്.
സാമ്പത്തിക വളർച്ചയുടെ ഗുണഫലങ്ങൾ സമൂഹത്തിലെ എല്ലാ തലങ്ങളിലുമുള്ള ആളുകളിലേക്ക് എത്തണമെന്ന് മാർപാപ്പ ഓർമ്മിപ്പിച്ചു. ജനങ്ങൾ സമ്പദ്‌വ്യവസ്ഥയെ സേവിക്കുന്നതിന് പകരം സാമ്പത്തിക ക്രമം ജനങ്ങളുടെ ക്ഷേമത്തിനാണ് ഉപയോഗിക്കേണ്ടത്. തീവ്രവലതുപക്ഷ നേതാവായ മിലി അധികാരമേറ്റ ശേഷമുള്ള മൂന്ന് വർഷത്തെ കടുത്ത സാമ്പത്തിക നിയന്ത്രണങ്ങൾ രാജ്യത്ത് ആഴത്തിലുള്ള ഭിന്നതകളാണ് സൃഷ്ടിച്ചിട്ടുള്ളത്.
കഠിനാധ്വാനം ചെയ്തിട്ടും കുടുംബം പുലർത്താൻ ബുദ്ധിമുട്ടുന്നവരുടെ ദുരിതങ്ങൾ ചൂണ്ടിക്കാട്ടിയ അദ്ദേഹം, ശാരീരിക-മാനസിക വെല്ലുവിളികൾ നേരിടുന്നവരോടും രോഗികളോടും ഭരണകൂടം പ്രത്യേക കരുതൽ കാട്ടണമെന്നും ആവശ്യപ്പെട്ടു. ഭിന്നശേഷിക്കാർക്കുള്ള സാമ്പത്തിക സഹായം സർക്കാർ വെട്ടിക്കുറച്ചതിനെ പരോക്ഷമായി വിമർശിച്ച മാർപാപ്പ, പരുക്കൻ ഭാഷാപ്രയോഗങ്ങൾക്ക് പേരുകേട്ട പ്രസിഡന്റ് ജനാധിപത്യം സംരക്ഷിക്കാൻ വാക്കുകൾ സൂക്ഷ്മമായി ഉപയോഗിക്കണമെന്നും മറ്റുള്ളവരെ കേൾക്കാൻ തയ്യാറാകണമെന്നും ഉപദേശിച്ചു.
