ടെൽ അവീവ്: ഇസ്രായേലിന് വർഷം തോറും നൽകിവന്നിരുന്ന 4 ബില്യൺ ഡോളറിന്റെ സൈനിക സഹായം ഈ വർഷത്തോടെ അവസാനിപ്പിക്കാനുള്ള അമേരിക്കൻ തീരുമാനത്തിന് കാരണം പ്രധാനമന്ത്രി ബെഞ്ചമിൻ നെതന്യാഹുവാണെന്ന് ഇസ്രായേലിലെ ഡെമോക്രാറ്റിക് പാർട്ടി നേതാവ് യയിർ ഗോലാൻ. നെതന്യാഹു ഒരു സമ്പൂർണ്ണ പരാജയമാണെന്ന് ആരോപിച്ച ഗോലാൻ, എക്സിലൂടെയാണ് പ്രധാനമന്ത്രിക്കെതിരെ രൂക്ഷമായ വിമർശനം ഉന്നയിച്ചത്.
യുഎസ് സാമ്പത്തിക സഹായം നിലയ്ക്കുന്നത് ഇസ്രായേലിന്റെ സമ്പദ്‌വ്യവസ്ഥയെയും പൗരന്മാരുടെ ജീവിതനിലവാരത്തെയും സുരക്ഷയെയും സാരമായി തകിടം മറിക്കുമെന്ന് ഗോലാൻ ചൂണ്ടിക്കാട്ടി. പ്രതിരോധച്ചെലവുകൾ കുതിച്ചുയരുകയും ആയുധശേഖരം പുനഃസ്ഥാപിക്കേണ്ടതായും വരുന്ന ഘട്ടത്തിൽ, സൈനികാവശ്യങ്ങൾക്കായുള്ള അധിക സാമ്പത്തിക ബാധ്യത സാധാരണ ജനങ്ങളുടെ ചുമലിലേക്ക് അടിച്ചേൽപ്പിക്കപ്പെടും. നീണ്ടുപോകുന്ന യുദ്ധത്തിൽ ഇസ്രായേൽ വ്യോമസേനയുടെ പ്രതിരോധശേഷി ദുർബലമായിക്കൊണ്ടിരിക്കുകയാണെന്നും അദ്ദേഹം വിശദീകരിച്ചു.
ഉത്തരവാദിത്തബോധമുള്ള ഒരു പ്രധാനമന്ത്രിയായിരുന്നെങ്കിൽ അമേരിക്കയുടെ പക്കൽ നിന്നുള്ള സാമ്പത്തിക സഹായം വർദ്ധിപ്പിക്കാനായിരുന്നു മുൻകൈയെടുക്കേണ്ടിയിരുന്നതെന്നും അദ്ദേഹം പറഞ്ഞു. സാമ്പത്തിക-സുരക്ഷാ പ്രതിസന്ധി രൂക്ഷമാകുന്നതോടെ രാജ്യത്തിന്റെ ഭാവി തന്നെ അപകടത്തിലാകുമെന്നും നെതന്യാഹുവിന്റെ ഭരണത്തിൽ കുറിക്കപ്പെട്ട മറ്റൊരു വലിയ പരാജയമാണിതെന്നും ഗോലാൻ കൂട്ടിച്ചേർത്തു.
