ഇസ്രയേലിന് വർഷം തോറും നൽകിവരുന്ന കോടിക്കണക്കിന് ഡോളറിന്റെ സാമ്പത്തിക സഹായം ഈ വർഷം അവസാനത്തോടെ നിർത്തലാക്കാൻ തീരുമാനിച്ചതായി മുൻ യുഎസ് പ്രസിഡന്റ് ഡൊണാൾഡ് ട്രംപ്. ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായി സംസാരിച്ച് ഇക്കാര്യത്തിൽ മാസങ്ങൾക്ക് മുൻപേ ധാരണയിലെത്തിയതാണെന്നും ഇരുവിഭാഗത്തിനും ഇതിൽ പൂർണ്ണ യോജിപ്പാണെന്നും ഫോക്സ് ന്യൂസിന് നൽകിയ അഭിമുഖത്തിൽ അദ്ദേഹം വ്യക്തമാക്കി.
ഇസ്രയേലിന് പ്രതിവർഷം നാല് ബില്യൺ ഡോളർ നൽകുന്ന കരാറിൽ താനും നെതന്യാഹുവും ഒപ്പുവെച്ചിരുന്നുവെന്നും, എന്നാൽ ഈ വർഷത്തോടെ പണം നൽകുന്നത് അവസാനിപ്പിക്കാൻ നേരത്തെ തന്നെ തീരുമാനിച്ചതിനാൽ തുടർന്നും തുക ചെലവഴിക്കുന്നത് അർത്ഥശൂന്യമാണെന്നും ട്രംപ് പറഞ്ഞു. അമേരിക്കയിൽ നിന്നുള്ള ഇത്തരം സാമ്പത്തിക സഹായങ്ങൾ സ്വീകരിക്കാതിരിക്കുന്നതാണ് ഉചിതമെന്ന ആശയം ആദ്യം മുന്നോട്ടുവെച്ചത് ബെഞ്ചമിൻ നെതന്യാഹു തന്നെയാണെന്നും ട്രംപ് അവകാശപ്പെട്ടു.
നേരിട്ടുള്ള പണമിടപാട് അവസാനിപ്പിച്ചാലും ആവശ്യമെങ്കിൽ അമേരിക്ക ഇസ്രയേലിനെ തുടർന്നും സഹായിക്കുമെന്ന് അദ്ദേഹം വ്യക്തമാക്കി. ഇസ്രയേൽ മികച്ചൊരു സഖ്യരാജ്യമാണെന്നും ആയുധങ്ങളോ മറ്റ് സൈനിക ആവശ്യങ്ങളോ അമേരിക്കയിൽ നിന്ന് നേരിട്ട് വാങ്ങാൻ അവർക്ക് സാധിക്കുമെന്നും ട്രംപ് കൂട്ടിച്ചേർത്തു.
