മോസ്കോ/കീവ്: റഷ്യ-യുക്രെയ്ൻ യുദ്ധം തുടരുന്നതിനിടയിൽ ഇരുരാജ്യങ്ങളിലെയും അടിയന്തര മുന്നറിയിപ്പ് ആപ്ലിക്കേഷനുകളിൽ കടന്നുകയറി ഹാക്കർമാർ ജനങ്ങൾക്ക് തെറ്റായ ഭീഷണി സന്ദേശങ്ങൾ അയച്ചു. യുക്രെയ്ന്റെ എയർ റൈഡ് അലർട്ട് സിസ്റ്റവും റഷ്യയിലെ അടിയന്തര സുരക്ഷാ ആപ്പുകളുമാണ് സൈബർ ആക്രമണത്തിനിരയായത്.
യുക്രെയ്നിൽ വ്യോമാക്രമണ മുന്നറിയിപ്പ് ശൃംഖലയെയാണ് ഹാക്കർമാർ ആദ്യം ലക്ഷ്യമിട്ടത്; ഇതിലൂടെ രാസായുധ-റേഡിയേഷൻ ഭീഷണികളടങ്ങിയ സന്ദേശങ്ങൾ മൊബൈലുകളിലും കീവിലെ തെരുവുകളിലെ ലൗഡ് സ്പീക്കറുകളിലും മുഴങ്ങി. എന്നാൽ, രാജ്യത്ത് യാതൊരുവിധ റേഡിയേഷൻ ഭീഷണിയുമില്ലെന്നും ബാഹ്യ ഇടപെടലാണ് ഇതിന് പിന്നിലെന്നും യുക്രെയ്ൻ വ്യോമസേന വ്യക്തമാക്കി. പ്രാദേശിക സംവിധാനത്തിൽ മാത്രമാണ് പ്രശ്നമുണ്ടായതെന്നും രാജ്യവ്യാപക അലർട്ട് സംവിധാനം സുരക്ഷിതമായി പ്രവർത്തിക്കുന്നുണ്ടെന്നും ഡിജിറ്റൽ ട്രാൻസ്ഫർമേഷൻ മന്ത്രാലയവും അറിയിച്ചു.
മറുവശത്ത്, റഷ്യയിലെ അടിയന്തര സുരക്ഷാ ആപ്ലിക്കേഷനുകളിലും ജനസുരക്ഷയെ ബാധിക്കുന്ന തരത്തിലുള്ള വ്യാജ മുന്നറിയിപ്പുകൾ പ്രചരിപ്പിക്കപ്പെട്ടു. ആപ്പിലുണ്ടായ സുരക്ഷാവീഴ്ച പരിഹരിച്ചതായും സംവിധാനങ്ങൾ സാധാരണ നിലയിലായതായും റഷ്യൻ വാർത്താ ഏജൻസിയായ ടാസ് അറിയിച്ചു.
