റിയാദ്: തലസ്ഥാനമായ റിയാദിനെ ലക്ഷ്യമിട്ടെത്തിയ രണ്ട് ഹൂതി മിസൈലുകൾ സൗദി അറേബ്യ വെടിവെച്ചിട്ടു. സംഘർഷം രൂക്ഷമായ പശ്ചാത്തലത്തിൽ സൗദിയിലേക്കുള്ള വിമാന സർവീസുകൾ നവംബർ ഒന്ന് വരെ താൽക്കാലികമായി റദ്ദാക്കിയതായി ഫ്ലൈദുബായ് വ്യക്തമാക്കി.
ഇതിനിടെ, ഹോർമൂസ് കടലിടുക്കിൽ മൈൻ സ്ഫോടനത്തെ തുടർന്ന് മൂന്ന് കപ്പലുകൾക്ക് തീപിടിച്ചതായും ഒമാൻ തീരപ്രദേശത്ത് മറ്റൊരു കപ്പൽ ആക്രമണത്തിനിരയായതായും റിപ്പോർട്ടുകളുണ്ട്. സുരക്ഷാ സാഹചര്യം വിലയിരുത്തിയാണ് എയർലൈനുകൾ സർവീസുകൾ വെട്ടിച്ചുരുക്കുന്നത്.
റിയാദ്, നജ്റാൻ മേഖലകൾ മുതൽ രാജ്യത്തിന്റെ കിഴക്ക്-പടിഞ്ഞാറൻ തീരപ്രദേശങ്ങൾ വരെയുള്ള നിർണ്ണായക വാണിജ്യ-സൈനിക കേന്ദ്രങ്ങളെയാണ് ലക്ഷ്യമിട്ടതെന്ന് ഹൂതി സൈനിക വക്താവ് അവകാശപ്പെട്ടതായി എസ്ബിഎസ് റിപ്പോർട്ട് ചെയ്തു. സൗദിയുടെ സുപ്രധാന ഊർജ്ജ കേന്ദ്രങ്ങളായ റാസ് തനൂറ, അബ്ഖൈഖ്, റാബിഗ് എണ്ണ ശുദ്ധീകരണ ശാലകളും പ്രധാന വ്യോമപാതകളായ റിയാദ്, ദമാം വിമാനത്താവളങ്ങളും ഇതിൽ ഉൾപ്പെടുന്നു.
