ടെൽ അവീവ്: പൊതുതെരഞ്ഞെടുപ്പ് ഫലം പുറത്തുവന്നതോടെ ഇസ്രയേലിൽ സർക്കാർ രൂപീകരണം കടുത്ത അനിശ്ചിതത്വത്തിൽ. 120 അംഗങ്ങളുള്ള പാർലമെന്റായ നെസറ്റിൽ കേവലഭൂരിപക്ഷം നേടാൻ പ്രധാന മുന്നണികൾക്കൊന്നും സാധിക്കാതെ വന്നതോടെയാണ് രാഷ്ട്രീയ പ്രതിസന്ധി ഉടലെടുത്തത്. എന്നാൽ ഭരണത്തിലേറുമെന്ന അവകാശവാദവുമായി രംഗത്തെത്തിയ പ്രതിപക്ഷ സഖ്യം, ലിക്കുഡ് പാർട്ടി നേതാവായ നിലവിലെ സ്പീക്കർ അമീർ ഒഹാനയെ പദവിയിൽ നിന്ന് നീക്കാൻ അറബ് പാർട്ടികളുടെ പിന്തുണയോടെ നീക്കം തുടങ്ങി.
തെരഞ്ഞെടുപ്പിൽ പ്രധാനമന്ത്രി ബെഞ്ചമിൻ നെതന്യാഹുവിന്റെ നേതൃത്വത്തിലുള്ള വലതുപക്ഷ സഖ്യം 53 സീറ്റുകൾ നേടി. 27 സീറ്റുകൾ നേടിയ നെതന്യാഹുവിന്റെ ലിക്കുഡ് പാർട്ടിയാണ് ഏറ്റവും വലിയ ഒറ്റക്കക്ഷി. എതിർചേരിയിൽ ഗാദി ഐസൻകോട്ടിന്റെ നേതൃത്വത്തിലുള്ള മധ്യപക്ഷ യാഷർ പാർട്ടി സഖ്യം 48 സീറ്റുകൾ സ്വന്തമാക്കി. അതേസമയം, ചരിത്രത്തിലെ ഏറ്റവും വലിയ നേട്ടവുമായി 19 സീറ്റുകളാണ് അറബ് പാർട്ടികൾ ഇത്തവണ സ്വന്തമാക്കിയത്.
അറബ് പാർട്ടികളുമായി പ്രതിപക്ഷം ഇതുവരെ ഔദ്യോഗിക സഖ്യ ചർച്ചകൾ ആരംഭിച്ചിട്ടില്ല. പാർട്ടികൾ തമ്മിലുള്ള ചർച്ചകളിലൂടെ സഖ്യസർക്കാർ രൂപീകരിക്കാനായില്ലെങ്കിൽ രാജ്യം വീണ്ടും മറ്റൊരു തെരഞ്ഞെടുപ്പിലേക്ക് നീങ്ങും. അതിനിടെ, വോട്ടെടുപ്പിൽ വ്യാപക ക്രമക്കേട് നടന്നതായി ആരോപിച്ച നെതന്യാഹു, സംഭവത്തിൽ പോലീസും ആഭ്യന്തര സുരക്ഷാ വിഭാഗമായ ഷിൻ ബെറ്റും സമഗ്ര അന്വേഷണം നടത്തണമെന്ന് ആവശ്യപ്പെട്ടു.
