വാഷിംഗ്ടൺ: ഹോർമുസ് കടലിടുക്കിന് പുറത്തേക്ക് പോകാൻ ശ്രമിച്ച നാല് എണ്ണക്കപ്പലുകൾക്ക് നേരെ ആക്രമണമുണ്ടായതായി യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷൻസ് (UKMTO) സ്ഥിരീകരിച്ചു. അജ്ഞാത പ്രൊജക്റ്റൈൽ പതിച്ച് കപ്പലുകൾക്ക് തീപിടിച്ചെങ്കിലും ജീവനക്കാർ സുരക്ഷിതരാണെന്നും, ഇറാനിലെ ലാവൻ ദ്വീപിന് തെക്ക് ഭാഗത്തും കപ്പലിന് നേരെ ആക്രമണം റിപ്പോർട്ട് ചെയ്തിട്ടുണ്ടെന്നും യുകെഎംടിഒ വ്യക്തമാക്കി.

സംഘർഷം കനക്കുന്നതിനിടെ, ആണവായുധ നിർവ്യാപന കരാറിൽ നിന്ന് പിന്മാറാനുള്ള പത്ത് നിർദ്ദേശങ്ങളടങ്ങിയ കരട് രേഖ ഇറാൻ പാർലമെന്റിന് ലഭിച്ചതായി സ്പീക്കർ അറിയിച്ചു. 2025-ൽ തങ്ങളുടെ ആണവ, സൈനിക കേന്ദ്രങ്ങൾക്ക് നേരെ നടന്ന ആക്രമണങ്ങൾക്ക് പിന്നാലെ കരാർ ഉപേക്ഷിക്കുമെന്ന് ഇറാൻ നേരത്തെ തന്നെ മുന്നറിയിപ്പ് നൽകിയിരുന്നു. എന്നാൽ ഇറാനുമായുള്ള നയതന്ത്ര ചർച്ചകൾ പുരോഗമിക്കുകയാണെന്നും നടക്കുന്നത് ഒരു സാധാരണ യുദ്ധമല്ലെന്നും യുഎസ് പ്രസിഡന്റ് ഡൊണാൾഡ് ട്രംപ് പ്രതികരിച്ചു.

ഹോർമുസ് കടലിടുക്കിലെ അടിയന്തര സാഹചര്യം യുഎസിൽ ചേർന്ന ജി20 വിദേശകാര്യ മന്ത്രിമാരുടെ യോഗത്തിനിടെ ആഗോളതലത്തിൽ ചർച്ചയായി. യുഎസ് സ്റ്റേറ്റ് സെക്രട്ടറി മാർക്കോ റൂബിയോ തുർക്കി വിദേശകാര്യ മന്ത്രി ഹകാൻ ഫിദാനുമായി കൂടിക്കാഴ്ച നടത്തിയപ്പോൾ, സൗദി വിദേശകാര്യ മന്ത്രി ഫൈസൽ ബിൻ ഫർഹാനും റഷ്യൻ വിദേശകാര്യ മന്ത്രി സെർജി ലാവ്‌റോവും വിഷയം പ്രത്യേകം ചർച്ച ചെയ്തു.