വാഷിങ്ടൺ: ഐക്യരാഷ്ട്രസഭയുടെ പൊതുസഭാ സമ്മേളനത്തിൽ അമേരിക്കൻ, ക്യൂബൻ പ്രതിനിധികൾ തമ്മിൽ തുറന്ന വാക്പോര്. ക്യൂബയ്ക്കെതിരെയുള്ള വാഷിങ്ടന്റെ സാമ്പത്തിക ഉപരോധത്തെ വിമർശിക്കുന്ന യുഎൻ പ്രമേയത്തിനെതിരെ സംസാരിച്ച യുഎസ് അംബാസഡർ മൈക്ക് വാൾട്സിനെതിരെ ക്യൂബൻ വിദേശകാര്യ മന്ത്രി ബ്രൂണോ റോഡ്രിഗസിന്റെ നേതൃത്വത്തിലുള്ള സംഘം മേശയിലടിച്ച് ശക്തമായ പ്രതിഷേധമുയർത്തുകയായിരുന്നു. 'നിങ്ങൾ നുണയനാണ്' എന്ന് റോഡ്രിഗസ് വിളിച്ചുപറഞ്ഞതിനെ തുടർന്ന്, 'ഇത് അമേരിക്കയാണ്, പിന്നോട്ട് മാറൂ' എന്ന് വാൾട്സും തിരിച്ചടിച്ചു.
ക്യൂബയിലേക്കുള്ള ഇന്ധനനീക്കം തടസ്സപ്പെടുത്തുന്ന വിധം അമേരിക്ക പ്രഖ്യാപിച്ച പുതിയ സാമ്പത്തിക ഉപരോധ നടപടികൾ ഇരുരാജ്യങ്ങളും തമ്മിലുള്ള നയതന്ത്ര തർക്കം കൂടുതൽ വഷളാക്കിയിട്ടുണ്ട്. ക്രൂഡോയിൽ ലഭ്യത കുറഞ്ഞത് കാരണം ക്യൂബയിലുടനീളം രൂക്ഷമായ പവർകട്ടും ജനജീവിതത്തെ സാരമായി ബാധിക്കുന്ന പ്രതിസന്ധികളുമാണ് നിലനിൽക്കുന്നത്.
അമേരിക്കൻ സാമ്പത്തിക ഉപരോധം പിൻവലിക്കണമെന്ന് ആവശ്യപ്പെട്ട് യുഎൻ പൊതുസഭയിൽ അവതരിപ്പിച്ച പ്രമേയത്തിന് കഴിഞ്ഞ വർഷം 165 രാഷ്ട്രങ്ങളുടെ പിന്തുണ ലഭിച്ചിരുന്നു. ഇത്തരം പ്രമേയങ്ങൾ നിയമപരമായി നിർബന്ധിതമല്ലെങ്കിലും ആഗോളതലത്തിൽ രാജ്യങ്ങളുടെ പൊതുനിലപാടിന്റെ പ്രതിഫലനമായാണ് നയതന്ത്രരംഗം ഇതിനെ നോക്കിക്കാണുന്നത്.
tags: യുഎൻ പൊതുസഭ വാക്പോര്, ക്യൂബ യുഎസ് തർക്കം, ബ്രൂണോ റോഡ്രിഗസ്, മൈക്ക്
