സൂറിച്ച്: ലോക ഫുട്ബോൾ ഭരണസമിതിയായ ഫിഫയെ നയിക്കാൻ പ്രസിഡന്റ് ജിയാനി ഇൻഫാന്റിനോയ്ക്ക് യോഗ്യതയില്ലെന്ന് ചൂണ്ടിക്കാട്ടി സൂറിച്ചിലെ ഫിഫ ആസ്ഥാനത്ത് ചേർന്ന കൗൺസിൽ യോഗത്തിൽ രൂക്ഷവിമർശനം. അടുത്ത വർഷം നടക്കാനിരിക്കുന്ന പ്രസിഡന്റ് തിരഞ്ഞെടുപ്പിൽ പദവി നിലനിർത്താൻ പോരാട്ടം നടത്തുന്നതിനിടെയാണ് മൂന്ന് മണിക്കൂറിലേറെ നീണ്ട യോഗത്തിൽ ഇൻഫാന്റിനോ കടുത്ത എതിർപ്പുകൾ നേരിട്ടത്.
ലോകകപ്പ് അടക്കമുള്ള ടൂർണമെന്റുകളിലെ ഓഹരികൾ സ്വകാര്യ നിക്ഷേപ സ്ഥാപനങ്ങൾക്ക് വിൽക്കാൻ ലക്ഷ്യമിട്ട് കൊണ്ടുവന്ന 'ഫിഫ ഫോർവേഡ് എന്റർപ്രൈസ്' (എഫ്.എഫ്.ഇ) പദ്ധതിയിൽ കൗൺസിലിനോട് അദ്ദേഹം മാപ്പപേക്ഷിച്ചു. ഈ നീക്കത്തിനെതിരെ ലോകകപ്പ് ഉൾപ്പെടെയുള്ള മത്സരങ്ങൾ ബഹിഷ്കരിക്കുമെന്ന് യുവേഫ ഭീഷണിപ്പെടുത്തുകയും ശക്തമായ പ്രതിഷേധങ്ങൾ ഉയരുകയും ചെയ്തതോടെ പദ്ധതി ഇൻഫാന്റിനോയ്ക്ക് ഉപേക്ഷിക്കേണ്ടി വന്നിരുന്നു.
വിവാദ പദ്ധതിക്ക് പുറമെ ദേശീയ ഫുട്ബോൾ അസോസിയേഷനുകൾക്കുള്ള ഫണ്ടിംഗ്, മുൻ യുഎസ് പ്രസിഡന്റ് ഡൊണാൾഡ് ട്രംപിന് നൽകിയ ഫിഫ പീസ് പ്രൈസ് എന്നിവ സംബന്ധിച്ചും യോഗത്തിൽ ചോദ്യങ്ങളുയർന്നു. വിലക്ക് പിൻവലിക്കാൻ ട്രംപ് പരസ്യമായി ആവശ്യപ്പെട്ടതിനെത്തുടർന്ന് അമേരിക്കൻ സ്‌ട്രൈക്കർ ഫൊളാരിൻ ബലോഗണിന് ഏർപ്പെടുത്തിയ വിലക്ക് റദ്ദാക്കിയ സംഭവത്തിലും ഇൻഫാന്റിനോ മറുപടി പറയേണ്ടിവന്നു.
