വാഷിങ്ടൺ: പതിനാല് വയസ്സിന് താഴെയുള്ള കുട്ടികൾ ഇൻസ്റ്റാഗ്രാം, ടിക്ടോക്, സ്നാപ്ചാറ്റ് തുടങ്ങിയ സോഷ്യൽ മീഡിയ പ്ലാറ്റ്‌ഫോമുകൾ ഉപയോഗിക്കുന്നത് തടയുന്ന ഫ്ലോറിഡ സംസ്ഥാന നിയമം (എച്ച്.ബി. 3) നടപ്പിലാക്കാൻ യുഎസ് ഫെഡറൽ അപ്പീൽ കോടതി അനുമതി നൽകി. നിയമം ഭരണഘടനാപരമായ അഭിപ്രായസ്വാതന്ത്ര്യത്തെ ഹനിക്കുന്നുവെന്ന ടെക് വ്യവസായ സംഘടനകളുടെ വാദങ്ങൾ തള്ളിയാണ് അറ്റ്‌ലാന്റ ആസ്ഥാനമായുള്ള 11-ാം യുഎസ് സർക്യൂട്ട് കോർട്ട് ഓഫ് അപ്പീൽസ് ബെഞ്ചിന്റെ ഏകകണ്ഠമായ വിധി.
വീഡിയോ ഓട്ടോപ്ലേ, ഇൻഫിനിറ്റ് സ്ക്രോളിങ് തുടങ്ങിയ അഡിക്ടീവ് ഫീച്ചറുകൾ ഉള്ള സോഷ്യൽ മീഡിയകളിൽ 14 വയസ്സിന് താഴെയുള്ള കുട്ടികൾ അക്കൗണ്ട് തുടങ്ങുന്നത് തടയുന്നതാണ് നിയമം. പ്ലാറ്റ്‌ഫോമുകളിലെ ഉള്ളടക്കങ്ങളെ ഈ നിയമം നിയന്ത്രിക്കുന്നില്ലെന്നും, അതിനാൽ തന്നെ ഭരണഘടനയുടെ ആദ്യ ഭേദഗതിയുടെ ലംഘനം ഇതിൽ ഉണ്ടാകുന്നില്ലെന്നും ട്രംപ് നിയോഗിച്ച സർക്യൂട്ട് ജഡ്ജ് കെവിൻ ന്യൂസം വിധിന്യായത്തിൽ വ്യക്തമാക്കി; ഇൻസ്റ്റാഗ്രാമിനെപ്പോലെ തന്നെ ട്രൂത്ത് സോഷ്യലിനും ഈ നിരോധനം തുല്യമായി ബാധകമാണെന്നും അദ്ദേഹം ചൂണ്ടിക്കാട്ടി.
നിയമത്തെ എതിർത്ത് മെറ്റ, ടിക്ടോക്, സ്നാപ് എന്നിവ ഉൾപ്പെടുന്ന നെറ്റ് ചോയ്സ്, കമ്പ്യൂട്ടർ & കമ്മ്യൂണിക്കേഷൻസ് ഇൻഡസ്ട്രി അസോസിയേഷൻ എന്നീ സംഘടനകൾ 2024-ൽ ഫയൽ ചെയ്ത ഹർജിയെ തുടർന്ന് കീഴ്ക്കോടതി ഏർപ്പെടുത്തിയിരുന്ന സ്റ്റേ പുതിയ ഉത്തരവോടെ റദ്ദായി. വിധിക്കെതിരെ തുടർനിയമനടപടികൾ വിലയിരുത്തുകയാണെന്ന് നെറ്റ് ചോയ്സ് ലിറ്റിഗേഷൻ സെന്റർ ഡയറക്ടർ പോൾ ടാസ്കെ വ്യക്തമാക്കി.
