വാഷിങ്ടൺ: മെക്സിക്കോ ഉൾക്കടലിനെ 'ഗൾഫ് ഓഫ് അമേരിക്ക' എന്ന് പുനർനാമകരണം ചെയ്യാൻ താൻ ഗൂഗിൾ മാപ്പ്സിനെ നേരിട്ട് ഫോണിൽ വിളിച്ചെന്നും, തന്നോടുള്ള ബഹുമാനം കാരണം കമ്പനി പേര് മാറ്റിയെന്നും യുഎസ് പ്രസിഡന്റ് ഡോണൾഡ് ട്രംപിന്റെ അവകാശവാദം. ബുധനാഴ്ച അരിസോണയിൽ നടന്ന തിരഞ്ഞെടുപ്പ് റാലിയിൽ സംസാരിക്കവെയാണ് ഔദ്യോഗിക രേഖകൾ ഉൾപ്പെടെ തയ്യാറാക്കിയാണ് ഈ മാറ്റം വരുത്തിയതെന്ന് ട്രംപ് പ്രസ്താവിച്ചത്.
2025 ജനുവരി 20-ന് രണ്ടാമതും പ്രസിഡന്റായി അധികാരമേറ്റതിന് പിന്നാലെ, യുഎസ് ഔദ്യോഗിക ആവശ്യങ്ങൾക്കായി പേര് മാറ്റാൻ നിർദേശിച്ച് ട്രംപ് എക്സിക്യൂട്ടീവ് ഉത്തരവിൽ ഒപ്പുവെച്ചിരുന്നു. തുടർന്ന് ആഭ്യന്തര സെക്രട്ടറി ഡഗ് ബർഗമിന്റെ നിർദേശപ്രകാരം യുഎസ് ജിയോളജിക്കൽ സർവേയുടെ ഔദ്യോഗിക ഡാറ്റാബേസിൽ വിവരങ്ങൾ പുതുക്കിയതിനെ തുടർന്നാണ് ഗൂഗിൾ മാപ്പ്സ് മാറ്റം വരുത്തിയത്. ഔദ്യോഗിക സർക്കാർ രേഖകൾ അടിസ്ഥാനമാക്കി മാപ്പുകൾ പുതുക്കുന്ന പൊതു രീതി മാത്രമാണിതെന്നാണ് കമ്പനിയുടെ വിശദീകരണം.
യുഎസ്, മെക്സിക്കോ, ക്യൂബ എന്നിവയുമായി അതിർത്തി പങ്കിടുന്ന ഈ ജലാശയത്തിന് അമേരിക്കയുടെ അധികാരപരിധിയിലുള്ള ഭാഗങ്ങൾക്ക് മാത്രമാണ് ഈ പേര് മാറ്റം ബാധകമായിട്ടുള്ളത്. നിലവിൽ യുഎസിലെ ഉപയോക്താക്കൾക്ക് 'ഗൾഫ് ഓഫ് അമേരിക്ക' എന്നും മെക്സിക്കോയിൽ 'ഗൾഫ് ഓഫ് മെക്സിക്കോ' എന്നും ഇന്ത്യയുൾപ്പെടെയുള്ള മറ്റ് രാജ്യങ്ങളിൽ ഇരു പേരുകളുമാണ് ഗൂഗിൾ മാപ്പ്സ് പ്രദർശിപ്പിക്കുന്നത്; ആപ്പിൾ മാപ്പ്സും പുതിയ പേര് ഉൾപ്പെടുത്തിയിട്ടുണ്ട്.
