അബുദാബി: ഫ്ലൈദുബായ് വിമാനത്തിന്റെ കോക്പിറ്റിൽ ഒമാൻ സ്വദേശിയായ സഹപൈലറ്റിന്റെ ക്രൂരമർദ്ദനമേറ്റ ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിന്റെ തലയോട്ടിക്ക് ഗുരുതരമായ ഒടിവ് സംഭവിച്ചതായി എൻഡിടിവി റിപ്പോർട്ട് ചെയ്തു. തലയോട്ടി അകത്തേക്ക് അമർന്നുപോകുന്ന ഡിപ്രസ്ഡ് ഫ്രാക്ചർ സംഭവിച്ചതിനെത്തുടർന്ന് അദ്ദേഹത്തിന് സൗദിയിൽ അടിയന്തര ശസ്ത്രക്രിയ നൽകി. തുടർചികിത്സയ്ക്കായി യുഎഇയിലേക്ക് എത്തിച്ച ഇദ്ദേഹം ഇപ്പോൾ അബുദാബിയിലെ മിലിട്ടറി ആശുപത്രിയിൽ വിദഗ്ദ്ധ ഡോക്ടർമാരുടെ നിരീക്ഷണത്തിലാണ്.
ആക്രമണത്തിൽ തലയോട്ടിക്ക് പുറമെ നെഞ്ചിലും കൈകാലുകളിലും വയറിന്റെ മുകൾഭാഗത്തും പൈലറ്റിന് പരിക്കേറ്റിട്ടുണ്ട്. നിലവിൽ അദ്ദേഹത്തിന്റെ ആരോഗ്യനിലയിൽ പുരോഗതിയുണ്ടെന്നും ചികിത്സകളോട് കൃത്യമായി പ്രതികരിക്കുന്നുണ്ടെന്നും ആശുപത്രി വൃത്തങ്ങളെ ഉദ്ധരിച്ചുള്ള റിപ്പോർട്ടുകൾ വ്യക്തമാക്കുന്നു.
