സിഡ്നി: പാർക്കിലേക്ക് നടക്കാനിറങ്ങി കാണാതായ പതിനെട്ടുകാരിയായ ലില്ലി ഹൂപ്പറിനെ എട്ട് നാളുകൾ നീണ്ട തെരച്ചിലിനൊടുവിൽ വനമേഖലയിൽ കൊല്ലപ്പെട്ട നിലയിൽ കണ്ടെത്തി. ഓസ്ട്രേലിയയിലെ സിഡ്നിയുടെ തെക്കൻ മലയോര പ്രദേശത്തെ ഇടതൂർന്ന കുറ്റിക്കാട്ടിൽ നിന്നാണ് വ്യാഴാഴ്ച മൃതദേഹം കണ്ടെടുത്തത്. ലില്ലിയെ ജീവനോടെ രക്ഷപ്പെടുത്തിയതായി സ്റ്റേറ്റ് പ്രധാനമന്ത്രി ന്യൂ സൗത്ത് വെയിൽസ് പാർലമെന്റിനെ അറിയിച്ചതിന് പിന്നാലെയാണ് പെൺകുട്ടി കൊല്ലപ്പെട്ട വിവരം പുറത്തുവരുന്നത്. പോലീസിന്റെ ഭാഗത്തുനിന്നുണ്ടായ തെറ്റായ വിവരമാണ് പാർലമെന്റിലെ തെറ്റായ പ്രസ്താവനയ്ക്ക് വഴിവെച്ചതും വലിയ വിവാദങ്ങൾക്ക് തിരികൊളുത്തിയതും. ഇതിനെത്തുടർന്ന് തെറ്റായ വിവരം കൈമാറിയതിൽ മാധ്യമങ്ങൾ വഴി കുടുംബത്തോട് പോലീസ് ക്ഷമാപണം നടത്തി.
കഴിഞ്ഞ ആഗസ്റ്റ് 12-നായിരുന്നു സമീപത്തെ ദേശീയ പാർക്കിൽ നടക്കാനായി ലില്ലി സ്വന്തം കാറിൽ വീട്ടിൽ നിന്നിറങ്ങിയത്. എന്നാൽ നേരം പുലർന്നിട്ടും കുട്ടി തിരിച്ചെത്താതിരിക്കുകയും ആശയവിനിമയം സാധ്യമാകാതെ വരികയും ചെയ്തതോടെ ബന്ധുക്കൾ പോലീസിൽ പരാതി നൽകുകയായിരുന്നു. തുടർന്ന് നടത്തിയ അന്വേഷണത്തിൽ നടായ് നാഷണൽ പാർക്കിലെ ദുർഘടമായ ഭാഗത്ത് പെൺകുട്ടിയുടെ വാഹനം കണ്ടെത്തി.
പോലീസ് സേനയോടൊപ്പം റൂറൽ ഫയർ സർവീസ്, നാഷണൽ പാർക്സ് ആൻഡ് വൈൽഡ് ലൈഫ് സർവീസ്, ഓസ്ട്രേലിയൻ ഡിഫൻസ് ഫോഴ്സിലെ നൂറോളം സൈനികർ എന്നിവർ ചേർന്നാണ് എട്ട് ദിവസത്തോളം പ്രദേശത്ത് വിപുലമായ തെരച്ചിൽ നടത്തിയത്. വിവരവിനിമയത്തിൽ സംഭവിച്ച വീഴ്ചയ്ക്ക് താൻ മാപ്പ് ചോദിക്കുന്നതായി ന്യൂ സൗത്ത് വെയിൽസ് പോലീസ് കമ്മീഷണർ മാൽ ലാനിയോൺ മാധ്യമങ്ങളോട് വ്യക്തമാക്കി. എന്നാൽ പെൺകുട്ടി ജീവനോടെയുണ്ടെന്ന തരത്തിൽ വിവരം എങ്ങനെ ലഭിച്ചുവെന്ന മാധ്യമങ്ങളുടെ ആവർത്തിച്ചുള്ള ചോദ്യങ്ങളിൽ നിന്ന് അസിസ്റ്റന്റ് പോലീസ് കമ്മീഷണർ ജോസഫ് കാസർ ഒഴിഞ്ഞുമാറി. ലില്ലിയുടേത് കൊലപാതകമാണെന്ന് പോലീസ് സ്ഥിരീകരിച്ചിട്ടുണ്ട്.
