ഇൻസ്റ്റഗ്രാം അപ്‌ഡേറ്റ് ചെയ്ത പല ഉപയോക്താക്കളുടെയും ശ്രദ്ധയിൽ അടുത്തിടെ പെട്ട ഒന്നാണ് പോസ്റ്റുകൾക്കും റീൽസുകൾക്കും ഒപ്പം കാണുന്ന 'മ്യൂസ്' (Muse) എന്ന പുതിയ ഓപ്ഷൻ. സാധാരണ ഷെയർ ബട്ടണിനൊപ്പം ഇത് പ്രത്യക്ഷപ്പെട്ടതോടെ സമൂഹമാധ്യമങ്ങളിൽ ഇതുമായി ബന്ധപ്പെട്ട ചർച്ചകളും സജീവമായിക്കഴിഞ്ഞു. എന്താണ് ഇൻസ്റ്റഗ്രാമിൽ എത്തിയ ഈ 'മ്യൂസ്'? ഇത് എങ്ങനെ പ്രവർത്തിക്കുന്നു എന്ന് പരിശോധിക്കാം. 

എന്താണ് ഇൻസ്റ്റഗ്രാം മ്യൂസ്?

മെറ്റ  തങ്ങളുടെ പ്ലാറ്റ്‌ഫോമുകളിൽ അവതരിപ്പിച്ചിരിക്കുന്ന നൂതന പേഴ്‌സണൽ എഐ ഏജന്റാണ് 'മ്യൂസ്'. സാധാരണ ചോദ്യങ്ങൾക്ക് മാത്രം മറുപടി നൽകുന്ന ചാറ്റ്ബോട്ടുകളിൽ നിന്ന് വ്യത്യസ്തമായി, ഉപയോക്താക്കൾക്ക് വേണ്ടി കാര്യങ്ങൾ സ്വയം ചെയ്തുതീർക്കാൻ  സഹായിക്കുന്ന രീതിയിലാണ് മ്യൂസ് രൂപകൽപ്പന ചെയ്തിരിക്കുന്നത്. ഇൻസ്റ്റഗ്രാം, വാട്സാപ്പ് തുടങ്ങിയ മെറ്റാ ആപ്പുകളിലുടനീളം ഇത് പ്രവർത്തിക്കും. 

മ്യൂസിന്റെ പ്രധാന സവിശേഷതകൾ

സേവ് ചെയ്ത പോസ്റ്റുകളെ പ്രവൃത്തിപഥത്തിലെത്തിക്കുന്നു:

നാം ഇൻസ്റ്റഗ്രാമിൽ സേവ് ചെയ്തുവെക്കുന്ന റസിപ്പികൾ, യാത്രാവിവരങ്ങൾ, വസ്ത്രങ്ങൾ തുടങ്ങിയവയിൽ നിന്ന് ആവശ്യമായ വിവരങ്ങൾ വേർതിരിച്ചെടുക്കാൻ മ്യൂസിന് സാധിക്കും. ഉദാഹരണത്തിന്, നിങ്ങൾ സേവ് ചെയ്ത ഒരു പാചകക്കുറിപ്പിൽ നിന്ന് പലചരക്ക് സാധനങ്ങളുടെ ലിസ്റ്റ് തയാറാക്കി തരാൻ മ്യൂസിന് കഴിയും. 

സ്മാർട്ട് സേർച്ച് സംവിധാനം:

പഴയ പോസ്റ്റുകളോ റീൽസുകളോ തപ്പിയെടുക്കാൻ ഇനി ബുദ്ധിമുട്ടേണ്ടതില്ല. "കഴിഞ്ഞ മാസം ഞാൻ സേവ് ചെയ്ത ആ നീല ഷർട്ടിന്റെ പോസ്റ്റ് കാണിക്കൂ" അല്ലെങ്കിൽ "ഗോവ യാത്രാ റീൽ കണ്ടുപിടിക്കൂ" എന്ന് സ്വാഭാവിക ഭാഷയിൽ ചോദിച്ചാൽ മ്യൂസ് അത് കണ്ടെത്തി നൽകും. 

ഷോപ്പിംഗും പ്ലാനിംഗും എളുപ്പമാക്കുന്നു:

റീൽസിൽ കാണുന്ന ഉൽപ്പന്നങ്ങൾ ഓൺലൈനിൽ തിരയാനും, വില താരതമ്യം ചെയ്യാനും ഇത് സഹായിക്കും. കൂടാതെ ഫിറ്റ്‌നസ് വീഡിയോകള്‍ അടിസ്ഥാനമാക്കി വർക്ക്ഔട്ട് പ്ലാനുകൾ തയാറാക്കാനും ഇവന്റ് പ്ലാനിംഗിനും മ്യൂസ് പിന്തുണ നൽകുന്നു. 

ക്രിയേറ്റർമാർക്കുള്ള സഹായം:

കണ്ടന്റ് ക്രിയേറ്റർമാർക്ക് ബ്രാൻഡ് സഹകരണങ്ങൾ വിലയിരുത്താനും അവരുടെ പ്ലാനിംഗുകൾ ചിട്ടപ്പെടുത്താനും മ്യൂസ് സഹായകരമാകും. 

സ്വകാര്യതയും സുരക്ഷയും

ഉപയോക്താക്കളുടെ സേവ് ചെയ്ത പോസ്റ്റുകളിലേക്കും ആശയവിനിമയങ്ങളിലേക്കും എഐ പ്രവേശിക്കുന്നത് സംബന്ധിച്ച് സ്വാഭാവികമായും സ്വകാര്യതാ ആശങ്കകൾ ഉയരുന്നുണ്ട്. എന്നാൽ പണം നൽകൽ, പ്രധാന സന്ദേശങ്ങൾ അയക്കൽ തുടങ്ങിയ നിർണായക കാര്യങ്ങളിൽ ഉപയോക്താവിന്റെ നേരിട്ടുള്ള അനുമതിയില്ലാതെ മ്യൂസ് പ്രവർത്തിക്കില്ലെന്ന് മെറ്റ വ്യക്തമാക്കിയിട്ടുണ്ട്. 

ഇന്ത്യയിലെ തിരഞ്ഞെടുത്ത ഉപയോക്താക്കൾക്ക് പരീക്ഷണാടിസ്ഥാനത്തിൽ ലഭ്യമായിത്തുടങ്ങിയ ഈ ഫീച്ചർ വരും ദിവസങ്ങളിൽ കൂടുതൽ പേരിലേക്ക് എത്തും.