മുൻനിര എഐ മോഡലുകളുടെ പുതിയ പതിപ്പായ 'ജെമിനി 4 ആർഗൺ' ഔദ്യോഗികമായി പുറത്തിറക്കി ഗൂഗിൾ. മുൻ പതിപ്പുകളെ അപേക്ഷിച്ച് കോഡിങ്, പ്രൊഫഷണൽ ജോലികൾ, സൈബർ സുരക്ഷ എന്നീ മേഖലകളിൽ വലിയ പുരോഗതിയാണ് ആർഗൺ കൈവരിച്ചിട്ടുള്ളതെന്ന് കമ്പനി അറിയിച്ചു. ജെമിനി 3.5 പ്രോ പുറത്തിറക്കുന്നത് വൈകിയതിനെത്തുടർന്ന് ഓപ്പൺ എഐ, ആന്ത്രോപിക് തുടങ്ങിയ എതിരാളികളേക്കാൾ ഗൂഗിൾ എഐ മത്സരത്തിൽ പിന്നിലായെന്ന തരത്തിൽ അഭ്യൂഹങ്ങൾ ശക്തമായിരുന്നു. ഇത്തരം പ്രചാരണങ്ങൾക്ക് മറുപടിയുമായി ഗൂഗിൾ സിഇഒ സുന്ദർ പിച്ചൈ എക്സിൽ (ട്വിറ്റർ) രംഗത്തെത്തി: "ഞങ്ങളുടെ അടുത്ത മോഡലിനെക്കുറിച്ച് പുറത്ത് ഒട്ടനവധി ചർച്ചകൾ നടക്കുന്നുണ്ട്, അതിനാൽ എത്രയും വേഗം ഇതിന്റെ പ്രാഥമിക വിവരങ്ങൾ പങ്കുവെക്കാൻ ഞാൻ ആഗ്രഹിച്ചു. ജെമിനി 4 ആർഗണിനെ പരിചയപ്പെടുത്തുന്നു! സങ്കീർണ്ണമായ വർക്ക്ഫ്ലോകൾ, സൈബർ പ്രതിരോധം, സോഫ്റ്റ്‌വെയർ എഞ്ചിനീയറിംഗ് എന്നിവയിൽ ഏറ്റവും മുൻനിരയിലുള്ള പ്രകടനമാണ് ഇത് കാഴ്ചവെക്കുന്നത്." കോഡിങ്, ക്വാണ്ടം കമ്പ്യൂട്ടിംഗ് എന്നിവയുൾപ്പെടെയുള്ള വിവിധ ആവശ്യങ്ങൾക്കായി ഗൂഗിളിനുള്ളിലെ ടീമുകൾ ഇപ്പോൾത്തന്നെ ഈ മോഡൽ ഉപയോഗിക്കുന്നുണ്ടെന്നും സുന്ദർ പിച്ചൈ കൂട്ടിച്ചേർത്തു. ഗൂഗിൾ തങ്ങളുടെ ഒരു എഐ മോഡലിന് 'ആർഗൺ' എന്ന പേര് നൽകുന്നത് ആദ്യമായാണ്.

സങ്കീർണ്ണമായ പ്രക്രിയകളിൽ ആഴത്തിലുള്ള യുക്തിസഹമായ ചിന്തയ്ക്ക് (ഡീപ് റീസണിംഗ്) പ്രാപ്തമാകുന്ന തരത്തിലാണ് ജെമിനി 4 ആർഗൺ വികസിപ്പിച്ചിരിക്കുന്നത്. പത്ത് ലക്ഷം (1 മില്യൺ) ടോക്കണുകളാണ് ഇതിന്റെ ഔട്ട്പുട്ട് പരിധി. ഇത് മോഡലിന് കൂടുതൽ കാര്യക്ഷമമായി ചിന്തിക്കാനും ഒരൊറ്റ ഘട്ടത്തിൽ തന്നെ ലക്ഷക്കണക്കിന് ടോക്കണുകൾ സൃഷ്ടിച്ചുകൊണ്ട് സങ്കീർണ്ണമായ വലിയ ആവശ്യങ്ങൾ പൂർത്തിയാക്കാനും സഹായകരമാകുമെന്ന് ഗൂഗിൾ വ്യക്തമാക്കുന്നു. ജിപിടി-6 ആസ്ട്ര (GPT-6 Astra), ക്ലോഡ് ഫേബിൾ 5.1 (Claude Fable 5.1) തുടങ്ങിയ ഏറ്റവും മുൻനിരയിലുള്ള എതിരാളികളുടെ മോഡലുകളോട് ഒപ്പത്തിനൊപ്പം നിൽക്കാനും ചില പ്രത്യേക ജോലികളിൽ അവയേക്കാൾ മികച്ച പ്രകടനം പുറത്തെടുക്കാനും ആർഗണിന് സാധിക്കുമെന്നാണ് കമ്പനിയുടെ അവകാശവാദം. ഗൂഗിൾ പുറത്തുവിട്ട ബെഞ്ച്മാർക്ക് സ്കോറുകൾ പ്രകാരം, നോളജ് വർക്ക് പരിശോധിക്കുന്ന 'വാൽസ്' (Vals) പരീക്ഷണത്തിൽ ആർഗൺ 68.9 ശതമാനം നേടിയപ്പോൾ ജിപിടി-6 ആസ്ട്രയ്ക്ക് 63.1 ശതമാനവും ഫേബിൾ 5.1-ന് 65.8 ശതമാനവുമാണ് ലഭിച്ചത്. കോഡിങ് വിഭാഗത്തിലെ 'വൈബ് കോഡ് ബെഞ്ചിൽ' (Vibe Code Bench) 91.9 ശതമാനം സ്കോറോടെ ആർഗൺ മുന്നിലെത്തി; ക്ലോഡ് ഫേബിൾ 5.1 (90.3%), ജിപിടി-6 ആസ്ട്ര (89.6%) എന്നിവയായിരുന്നു തൊട്ടുപിന്നിൽ. എങ്കിലും 'ടെർമിനൽ-ബെഞ്ച് 4.0' പോലുള്ള ചില ടെസ്റ്റുകളിൽ ആർഗൺ മറ്റ് മോഡലുകളേക്കാൾ അല്പം പിന്നിലായിരുന്നു.

സൈബർ സുരക്ഷാ ശേഷികൾ

പുതിയ തലമുറ മോഡലായ ജെമിനി 4 ആർഗണിൽ വിപുലമായ സൈബർ പ്രതിരോധ സംവിധാനങ്ങൾ സജ്ജീകരിച്ചിട്ടുണ്ട്. സൈബർ സുരക്ഷാ പ്രതിരോധത്തിൽ ഉയർന്ന കാര്യക്ഷമത പുലർത്തുന്ന രീതിയിലാണ് ഇതിനെ പരിശീലിപ്പിച്ചിരിക്കുന്നതെന്നും, സോഫ്റ്റ്‌വെയറുകളിലെ ഗുരുതരമായ പിഴവുകൾ സ്വയം കണ്ടെത്താനും സ്ഥിരീകരിക്കാനും പരിഹരിക്കാനും (പാച്ച്) ഇതിന് കഴിയുമെന്നും ഗൂഗിൾ അറിയിച്ചു. ഗൂഗിളിന്റെ ഉടമസ്ഥതയിലുള്ള സൈബർ സുരക്ഷാ സ്ഥാപനമായ 'വിസ്' (Wiz) തങ്ങളുടെ 'സ്കാൻ ഫോർ ഗുഡ്' പദ്ധതിയിലൂടെ ആർഗൺ ഉപയോഗിക്കാൻ തുടങ്ങിക്കഴിഞ്ഞു. വിസിൽ നടത്തിയ ആദ്യഘട്ട പരീക്ഷണത്തിൽത്തന്നെ, ലോകമെമ്പാടുമുള്ള ആശുപത്രികൾ ഉപയോഗിക്കുന്ന ഹെൽത്ത്‌കെയർ സോഫ്റ്റ്‌‌വെയറുകളിൽ മുൻനിര എഐ മോഡലുകൾ കണ്ടെത്താതെപോയതും അതീവ സുപ്രധാന വിവരങ്ങൾ ചോരാൻ ഇടയാക്കുന്നതുമായ ഒരു സുരക്ഷാ പിഴവ് ആർഗൺ കൃത്യമായി കണ്ടെത്തി.

ആദ്യഘട്ടത്തിൽ പരിമിതമായ റിലീസ്

എഐ സുരക്ഷയെക്കുറിച്ചുള്ള ചർച്ചകൾ ശക്തമായിരിക്കുന്ന സാഹചര്യത്തിലാണ് ഈ മോഡലിന്റെ വരവ്. ഓപ്പൺ എഐയുടെ 'ഡേബ്രേക്ക്', ആന്ത്രോപിക്കിന്റെ 'പ്രോജക്ട് ഗ്ലാസ്വിങ്' എന്നിവയ്ക്ക് സമാനമായി, ഗൂഗിളിന്റെ 'ഫെയർവിൻഡ്' പദ്ധതിയിലൂടെ തെരഞ്ഞെടുത്ത വിശ്വസ്തരായ സൈബർ വിദഗ്ദ്ധർക്കും യുഎസ് സർക്കാരിനും മാത്രമായി തുടക്കത്തിൽ ആർഗണിന്റെ ലഭ്യത പരിമിതപ്പെടുത്തിയിരിക്കുകയാണ്. "ഏറ്റവും മികച്ച സുരക്ഷാ മുൻകരുതലുകളോടെ ഉത്തരവാദിത്തപരമായ രീതിയിലാണ് ആർഗൺ പുറത്തിറക്കുന്നത്; നിലവിൽ ഇത് യുഎസ് സർക്കാരിനും ഫെയർവിൻഡ് പ്രോഗ്രാമിലൂടെ വിശ്വസ്തരായ സൈബർ ഡിഫെൻഡർമാർക്കും ലഭ്യമാക്കിയിട്ടുണ്ട്. സുരക്ഷിതമായി തന്നെ എത്രയും വേഗം എല്ലാവരിലേക്കും എത്തിക്കും," സുന്ദർ പിച്ചൈ എക്സിൽ കുറിച്ചു. യുഎസ് പ്രസിഡന്റ് ഡൊണാൾഡ് ട്രംപിന്റെ എഐ കരാറുകളിൽ (AI accords) ഒപ്പുവെച്ച പ്രധാന ടെക് കമ്പനികളിൽ ഒന്നാണ് ഗൂഗിൾ.

പരിശോധകരിൽ നിന്നും സൈബർ വിദഗ്ദ്ധരിൽ നിന്നുമുള്ള അഭിപ്രായങ്ങൾ വിലയിരുത്തിയ ശേഷം പെയ്ഡ് എപിഐ ഉപഭോക്താക്കൾക്കും ഗൂഗിൾ എഐ അൾട്രാ സബ്സ്ക്രൈബർമാർക്കും ആർഗൺ ലഭ്യമാക്കിത്തുടങ്ങും. പ്രാരംഭ ഓഫർ എന്ന നിലയിൽ ഒരു ദശലക്ഷം ഇൻപുട്ട് ടോക്കണുകൾക്ക് 2 ഡോളറും (ഏകദേശം 190 രൂപ), ഒരു ദശലക്ഷം ഔട്ട്പുട്ട് ടോക്കണുകൾക്ക് 10 ഡോളറുമാണ് (ഏകദേശം 950 രൂപ) നിരക്ക്. കാഷെ ചെയ്ത ഇൻപുട്ട് ടോക്കണുകൾക്ക് 95 ശതമാനം ഇളവുണ്ടാകും. പ്രാരംഭ കാലാവധിക്ക് ശേഷം ഇത് യഥാക്രമം 4 ഡോളറും (ഏകദേശം 380 രൂപ), 20 ഡോളറുമായി (ഏകദേശം 1900 രൂപ) നിശ്ചയിക്കും.