ബെയ്ജിങ്: രണ്ടാം പതിപ്പ് വേൾഡ് ഹ്യൂമനോയ്ഡ് റോബോട്ട് ഗെയിംസിന് ചൈനയിൽ തുടക്കമായി. ശനിയാഴ്ച ആരംഭിച്ച അഞ്ചുദിവസത്തെ ഈ അന്താരാഷ്ട്ര കായികമേളയിൽ വിസ്മയിപ്പിക്കുന്ന പ്രകടനങ്ങളുമായാണ് അത്യാധുനിക റോബോട്ടുകൾ മാറ്റുരയ്ക്കുന്നത്. ഉസൈൻ ബോൾട്ടിന്റെ 100 മീറ്റർ ലോക റെക്കോർഡിനേക്കാൾ വേഗത്തിൽ ഓടിയെത്തിയ റോബോട്ടിന്റെ സ്പ്രിന്റ് പ്രകടനം ഗെയിംസിന്റെ പ്രധാന ആകർഷണമായി മാറി.
ബെയ്ജിങ്ങിലെ മത്സരവേദിയിൽ ഫുട്ബോൾ ഗ്രൗണ്ടിൽ സൂപ്പർതാരം ക്രിസ്റ്റ്യാനോ റൊണാൾഡോയുടെ പ്രശസ്തമായ 'സ്യു' (Siuuu) ശൈലിയിലുള്ള വിജയാഘോഷം അനുകരിച്ച റോബോട്ടും, ഉദ്ഘാടന ചടങ്ങിൽ കൃത്യമായ താളത്തിൽ മാർച്ച് പാസ്റ്റ് നടത്തിയ ഡ്രോയിഡുകളും ഏറെ ശ്രദ്ധ നേടി. 100 മീറ്റർ ഓട്ടത്തിന് പുറമെ ബോക്സിങ്, ഹൈജമ്പ്, തായ് ചി, ടേബിൾ ടെന്നീസ് തുടങ്ങി വിവിധ കായിക ഇനങ്ങളിലാണ് റോബോട്ടുകൾ പരസ്പരം മത്സരിക്കുന്നത്.
