മുംബൈ: ഇന്ത്യൻ ക്രിക്കറ്റ് ടീമിന്റെ മുഖ്യ സെലക്ടർ പദവിയിൽ നിന്നുള്ള കാലാവധി പൂർത്തിയാകാൻ വിരലിലെണ്ണാവുന്ന ദിവസങ്ങൾ മാത്രം ശേഷിക്കെ, അജിത് അഗാർക്കർക്ക് ശക്തമായ പിന്തുണയുമായി മുൻ ഇന്ത്യൻ ഓൾറൗണ്ടർ രവിചന്ദ്രൻ അശ്വിൻ. താനടക്കമുള്ള സീനിയർ കളിക്കാരുടെ വിടവാങ്ങലിലേക്ക് നയിച്ച അഗാർക്കറുടെ കടുത്ത നിലപാടുകൾ വ്യക്തിപരമായ വിരോധം മൂലമുള്ളതല്ലെന്നും മറിച്ച് ഇന്ത്യൻ ക്രിക്കറ്റിന്റെ ശോഭനമായ ഭാവി മാത്രം ലക്ഷ്യമിട്ടുള്ളതാണെന്നും അശ്വിൻ വ്യക്തമാക്കി.
അജിത് അഗാർക്കറുമായി വ്യക്തിപരമായി തനിക്ക് അടുത്ത ബന്ധമുണ്ടെന്ന് അശ്വിൻ പറഞ്ഞു. കളി അവസാനിപ്പിക്കുന്ന ഘട്ടത്തിൽ താൻ അദ്ദേഹവുമായി ആശയവിനിമയം നടത്തിയിരുന്നു. ടീമിലെ പരിചയസമ്പന്നരായ മുതിർന്ന താരങ്ങളെ മാറ്റിനിർത്തിക്കൊണ്ട് പുതിയൊരു തലമുറയെ വാർത്തെടുക്കുക എന്നത് അതീവ വെല്ലുവിളികളും ഉത്തരവാദിത്തവുമുള്ള കാര്യമാണ്. ആ തീരുമാനപ്രകാരം ഒഴിവാക്കപ്പെട്ട സീനിയർ കളിക്കാരുടെ കൂട്ടത്തിൽ താനും ഉൾപ്പെട്ടിരുന്നു. എന്നിരുന്നാലും, വ്യക്തിപരമായ ഈഗോ മാറ്റിവെച്ച് നിഷ്പക്ഷമായി വിലയിരുത്തിയാൽ, അഗാർക്കർ അങ്ങേയറ്റം മികച്ച ഒരു മുഖ്യ സെലക്ടറായിരുന്നുവെന്ന് നിസംശയം പറയാൻ സാധിക്കുമെന്നും അശ്വിൻ കൂട്ടിച്ചേർത്തു. ഒക്ടോബർ നാലിനാണ് മുഖ്യ സെലക്ടർ സ്ഥാനത്തുള്ള അഗാർക്കറുടെ കരാർ അവസാനിക്കുന്നത്.
