ലീഡ്‌സ്: ലീഡ്‌സിൽ ചരിത്രനേട്ടം സ്വന്തം പേരിൽ കുറിച്ച് ഇംഗ്ലീഷ് വിക്കറ്റ് കീപ്പർ ബാറ്റർ ജോസ് ബട്ട്ലർ. ഏകദിന, ട്വന്റി20 ഫോർമാറ്റുകളിലായി ആകെ പതിനായിരത്തിലധികം റൺസ് തികയ്ക്കുന്ന ആദ്യ ഇംഗ്ലണ്ട് താരമെന്ന അപൂർവ നാഴികക്കല്ലാണ് അദ്ദേഹം സ്വന്തമാക്കിയത്. ഇതോടെ ഇംഗ്ലണ്ടിന്റെ ലിമിറ്റഡ് ഓവർ ക്രിക്കറ്റ് ചരിത്രത്തിലെ എക്കാലത്തെയും മികച്ച ബാറ്റിംഗ് വിസ്മയമാണ് താനെന്ന് ബട്ട്ലർ വീണ്ടും അടിവരയിട്ടു. ശ്രീലങ്കയ്‌ക്കെതിരായ രണ്ടാം ഏകദിനത്തിൽ 322 റൺസ് വിജയലക്ഷ്യത്തിലേക്ക് ബാറ്റേന്തിയ ഇംഗ്ലണ്ടിനായി വെടിക്കെട്ട് പ്രകടനമാണ് താരം പുറത്തെടുത്തത്. മത്സരത്തിനിടെ പരിക്കേറ്റ് റിട്ടയേർഡ് ഹർട്ടായി കളംവിടേണ്ടി വന്നെങ്കിലും 140.82 സ്ട്രൈക്ക് റേറ്റിൽ 49 പന്തുകളിൽ നിന്ന് അഞ്ച് ഫോറും അഞ്ച് സിക്സുമടക്കം 69 റൺസ് ബട്ട്ലർ അടിച്ചുകൂട്ടി. ഒരുവേള ഇംഗ്ലണ്ട് അനായാസം ജയിക്കുമെന്ന് തോന്നിച്ച മത്സരത്തിൽ അവസാന ഓവറുകളിലെ തകർപ്പൻ ബൗളിംഗിലൂടെ ശ്രീലങ്ക കളി തിരിച്ചുപിടിക്കുകയായിരുന്നു.

പുതിയ നേട്ടത്തോടെ 204 ഏകദിനങ്ങളിലെ 176 ഇന്നിങ്‌സുകളിൽ നിന്നായി 39.15 ശരാശരിയിലും 115.54 സ്ട്രൈക്ക് റേറ്റിലും 5,678 റൺസ് ബട്ട്ലറുടെ പേരിലായി. പുറത്താകാതെ നേടിയ 162 റൺസാണ് ഉയർന്ന സ്കോർ; 11 സെഞ്ചുറികളും 30 അർധസെഞ്ചുറികളും ഇതിലുണ്ട്. ഏകദിനത്തിൽ ഇംഗ്ലണ്ടിനായി ഏറ്റവും കൂടുതൽ റൺസ് നേടിയ മൂന്നാമത്തെ ബാറ്ററാണ് അദ്ദേഹം. അതേസമയം, ടി20 അന്താരാഷ്ട്ര മത്സരങ്ങളിൽ ഇംഗ്ലണ്ടിന്റെ റൺവേട്ടക്കാരിൽ ഒന്നാമനായ ബട്ട്ലർ, 163 കളികളിലെ 150 ഇന്നിങ്സുകളിൽ നിന്നായി 34.79 ശരാശരിയിലും 150.13 സ്ട്രൈക്ക് റേറ്റിലും 4,384 റൺസ് നേടിയിട്ടുണ്ട്. രണ്ട് സെഞ്ചുറികളും 30 അർധസെഞ്ചുറികളുമാണ് കുട്ടിക്രിക്കറ്റിലെ സമ്പാദ്യം.

ഇരു വൈറ്റ് ബോൾ ഫോർമാറ്റുകളിലുമായി ആകെ 367 മത്സരങ്ങളിലെ 326 ഇന്നിങ്‌സുകളിൽ നിന്ന് 13 സെഞ്ചുറികളും 60 അർധ സെഞ്ചുറികളും ഉൾപ്പെടെ 37.12 ശരാശരിയിൽ 10,062 റൺസാണ് താരം വാരിക്കൂട്ടിയത്. 57 ടെസ്റ്റ് മത്സരങ്ങളിൽ നിന്ന് നേടിയ 2,907 റൺസ് (രണ്ട് സെഞ്ചുറികളും 18 അർധസെഞ്ചുറികളും) കൂടി പരിഗണിച്ചാൽ, അന്താരാഷ്ട്ര തലത്തിൽ 424 മത്സരങ്ങളിലെ 426 ഇന്നിങ്‌സുകളിൽ നിന്ന് 35.82 ശരാശരിയിൽ 12,969 റൺസ് ബട്ട്ലർ സ്വന്തമാക്കിയിട്ടുണ്ട്. കുശാൽ മെൻഡിസിന്റെ ഗംഭീര സെഞ്ചുറിയുടെയും ഡെത്ത് ഓവറുകളിലെ കൃത്യതയാർന്ന ബൗളിംഗിന്റെയും കരുത്തിൽ, ലീഡ്‌സിലെ ഈ ഉയർന്ന സ്കോറിംഗ് പോരാട്ടത്തിൽ ഇംഗ്ലണ്ടിനെ 16 റൺസിന് തോൽപ്പിച്ച് ശ്രീലങ്ക വിജയം പിടിച്ചെടുത്തു. ഈ വിജയത്തോടെ മൂന്ന് മത്സരങ്ങളടങ്ങിയ ഏകദിന പരമ്പര 1-1 എന്ന നിലയിൽ ഒപ്പത്തിനൊപ്പമായി.