തിരുവനന്തപുരം: സർക്കാർ ആശുപത്രികളിലെ രൂക്ഷമായ മരുന്ന് ദൗർലഭ്യവും ഭരണപരമായ പിടിപ്പുകേടും ഉന്നയിച്ച് നിയമസഭയിൽ പ്രതിപക്ഷം വാക്കൗട്ട് നടത്തി. കെ.വി. സുമേഷ് എംഎൽഎ അടിയന്തര പ്രമേയത്തിന് നോട്ടീസ് നൽകി ഉന്നയിച്ച വിഷയത്തിൽ, സംസ്ഥാനത്തെ ആരോഗ്യമേഖല വെന്റിലേറ്ററിലാണെന്നും മരുന്ന് സംഭരണ വിതരണം താറുമാറായതിന് പിന്നിൽ സ്വകാര്യ ആശുപത്രികളുമായുള്ള രഹസ്യ ഇടപാടാണോയെന്നും പ്രതിപക്ഷ നേതാവ് പിണറായി വിജയൻ ചോദിച്ചു. മുൻ സർക്കാരിന്റെ തലയിൽ പഴിചാരി രക്ഷപ്പെടാനാണ് ഇപ്പോഴത്തെ നീക്കമെന്നും, അട്ടപ്പാടിയിൽ ഏഴ് ജൂനിയർ ഹെൽത്ത് ഓഫീസർ തസ്തികകൾ ഒഴിഞ്ഞുകിടക്കുന്നതടക്കമുള്ള അനാസ്ഥ മൂലം ഗർഭിണികൾക്കും കുട്ടികൾക്കും ചികിത്സ നിഷേധിക്കപ്പെടുകയാണെന്നും ജീവനക്കാരെ കൂട്ടത്തോടെ സ്ഥലം മാറ്റുകയാണെന്നും അദ്ദേഹം ആരോപിച്ചു.
എന്നാൽ മരുന്ന് ക്ഷാമമെന്ന ആരോപണം ഊതിവീർപ്പിച്ചതാണെന്നും അധികാരം നഷ്ടപ്പെട്ട അസുഖത്തിനുള്ള മരുന്നിന് മാത്രമാണ് ഇപ്പോൾ സ്റ്റോക്കില്ലാത്തതെന്നും ആരോഗ്യമന്ത്രി കെ. മുരളീധരൻ തിരിച്ചടിച്ചു. പെരുമാറ്റച്ചട്ടത്തിന്റെ പേരിൽ മുൻ ഭരണകൂടം പർച്ചേസ് ഓർഡർ നൽകാതിരുന്നതും യുദ്ധസാഹചര്യവും അസംസ്കൃത വസ്തുക്കളുടെ ദൗർലഭ്യവും ഭീമമായ കുടിശ്ശികയുമാണ് മുൻപ് തടസ്സമായതെന്നും ഒക്ടോബർ മുതൽ ഡിസംബർ വരെയാണ് മരുന്ന് വാങ്ങൽ നടക്കുന്നതെന്നും മന്ത്രി വ്യക്തമാക്കി. പവർകട്ട് കാരണം ശസ്ത്രക്രിയകളൊന്നും മുടങ്ങിയിട്ടില്ലെന്നും ലോക്കൽ പർച്ചേസ് വഴിയും കൂടുതൽ സ്റ്റോക്കുള്ള ആശുപത്രികളിൽ നിന്ന് മാറ്റിനൽകിയും പ്രതിസന്ധി പരിഹരിച്ചെന്നും ഇടനിലക്കാരെ ഒഴിവാക്കി കെഎംഎസ്സിഎൽ നേരിട്ട് സംഭരണം നടത്തുമെന്നും മന്ത്രി സഭയെ അറിയിച്ചു.
മരുന്നിന് ക്ഷാമമില്ലെന്നും ചിലതിന്റെ കുറവ് മാത്രമാണെന്നുമുള്ള മന്ത്രിയുടെ മറുപടി ആത്മാർത്ഥതയില്ലാത്തതാണെന്നും ആ കുറവ് തന്നെയാണ് ക്ഷാമമെന്നും ചൂണ്ടിക്കാട്ടി പ്രതിപക്ഷം സഭ ബഹിഷ്കരിച്ചു. സർക്കാർ ആശുപത്രികളെ ജനം കൂടുതൽ ആശ്രയിക്കുന്നതിനാലാണ് പനി കേസുകൾ കൂടുതലായി രേഖപ്പെടുത്തുന്നതെന്നും ആരോഗ്യവകുപ്പിൽ കാര്യമായ പ്രശ്നങ്ങളൊന്നുമില്ലെന്നും മന്ത്രി ആവർത്തിച്ചു.
.
