ബെംഗളൂരു: സംസ്ഥാനത്ത് ഇപ്പോൾ ഒരു തെരഞ്ഞെടുപ്പ് പ്രഖ്യാപിച്ചാൽ മന്ത്രിസഭയിലെ അംഗങ്ങളുൾപ്പെടെ ഭരണകക്ഷിയായ കോൺഗ്രസിന്റെ 25 എംഎൽഎമാർ ബിജെപിയിൽ ചേരുമെന്ന് ബിജെപി കർണാടക സംസ്ഥാന അധ്യക്ഷൻ ബി വൈ വിജയേന്ദ്ര. ഭരണപക്ഷത്തെ പ്രമുഖരെ പാർട്ടിയിലെത്തിക്കാൻ ശ്രമം നടക്കുന്നുണ്ടോ എന്ന മാധ്യമങ്ങളുടെ ചോദ്യത്തിന്, നേതാക്കളെ പണം കൊടുത്ത് വാങ്ങേണ്ട ആവശ്യമില്ലെന്നും കർണാടകയിലെ നിലവിലെ രാഷ്ട്രീയ സാഹചര്യം ബിജെപിക്ക് അനുകൂലമായതിനാൽ പലരും മറുകണ്ടം ചാടാൻ ഒരുങ്ങിക്കഴിഞ്ഞുവെന്നും അദ്ദേഹം പ്രതികരിച്ചു.
വിജയേന്ദ്രയുടെ ഈ അവകാശവാദത്തെ പരിഹസിച്ച് തള്ളിയ മുഖ്യമന്ത്രി ഡി കെ ശിവകുമാർ, സമയം പാഴാക്കാതെ അവരെ വേഗം ബിജെപിയിലേക്ക് കൊണ്ടുപോകാൻ വെല്ലുവിളിച്ചു. രാജ്യസഭാ തെരഞ്ഞെടുപ്പിൽ ആരുടെ നേതാക്കളാണ് കോൺഗ്രസിന് അനുകൂലമായി ക്രോസ് വോട്ട് ചെയ്തതെന്ന് വ്യക്തമാക്കാൻ കുമാരസ്വാമിക്കോ വിജയേന്ദ്രയ്ക്കോ സാധിക്കില്ലെന്നും മുഖ്യമന്ത്രി കൂട്ടിച്ചേർത്തു.
