ന്യൂഡൽഹി: യുപിഐ ഇടപാടുകളിൽ ഏർപ്പെടുത്താനിരുന്ന 'മർച്ചന്റ് ഡിസ്‌കൗണ്ട് റേറ്റ്' (MDR) നടപ്പിലാക്കുന്നത് ദീപാവലി ആഘോഷങ്ങൾക്ക് ശേഷത്തേക്ക് മാറ്റിവെച്ചതായി നാഷണൽ പേയ്‌മെന്റ്സ് കോർപ്പറേഷൻ ഓഫ് ഇന്ത്യ (എൻപിസിഐ). ഒക്ടോബർ 15 മുതൽ എംഡിആർ പ്രാബല്യത്തിൽ വരുമെന്നായിരുന്നു മുൻ തീരുമാനം; എന്നാൽ ഉത്സവകാലത്തെ ഇടപാടുകൾ തടസ്സപ്പെടാതിരിക്കാൻ നിർദ്ദേശം നീട്ടിവെക്കണമെന്ന് ആവശ്യപ്പെട്ട് ഫിൻടെക് സ്ഥാപനങ്ങളും വ്യാപാരി സംഘടനകളും പേയ്‌മെന്റ് കമ്പനികളും എൻപിസിഐയെ സമീപിക്കുകയായിരുന്നു.

ഇതേത്തുടർന്ന്, തിരഞ്ഞെടുത്ത 'പേഴ്സൺ-ടു-മർച്ചന്റ്' (P2M) ഇടപാടുകളിൽ നിരക്ക് ചുമത്തുന്നത് ദീപാവലിക്ക് ശേഷം മതിയെന്ന് യുപിഐ ആൻഡ് സർവീസസ് സ്റ്റിയറിംഗ് കമ്മിറ്റി തീരുമാനിക്കുകയായിരുന്നു.

ഇത് സംബന്ധിച്ച കൃത്യമായ തീയതി പിന്നീട് പുറത്തുവിടുമെന്ന് ഒക്ടോബർ 13-ന് പുറത്തിറക്കിയ വാർത്താക്കുറിപ്പിൽ എൻപിസിഐ വ്യക്തമാക്കി.