തിരുവനന്തപുരം: എൽപിഎസ്ടി ഉദ്യോഗാർത്ഥികളുടെ സമരപ്പന്തൽ പൊളിച്ചുനീക്കിയ നടപടി സംസ്ഥാന സർക്കാരിന്റെ അസഹിഷ്ണുതയാണ് വ്യക്തമാക്കുന്നതെന്ന് പ്രതിപക്ഷ നേതാവ് പിണറായി വിജയൻ. സമാധാനപരമായി സമരം ചെയ്യുന്നവരെ ബലപ്രയോഗത്തിലൂടെ നേരിടുന്ന അതിക്രമത്തിന് മുഖ്യമന്ത്രി തന്നെയല്ലേ നേതൃത്വം നൽകുന്നതെന്ന് അദ്ദേഹം ചോദിച്ചു; വളർമതി മുടി മുറിച്ചപ്പോൾ കരഞ്ഞുപോയവരാണിപ്പോൾ ഈ നടപടിക്ക് പിന്നിലെന്നും അദ്ദേഹം ഫേസ്ബുക്ക് കുറിപ്പിലൂടെ വിമർശിച്ചു.
ഡൽഹിയിൽ നരേന്ദ്ര മോദിയും സംഘപരിവാറും നടപ്പാക്കുന്ന രീതികൾ കേരളത്തിലും ആവർത്തിക്കാമെന്ന വി.ഡി. സതീശന്റെയും യുഡിഎഫിന്റെയും വ്യാമോഹം ഇവിടെ നടപ്പാകില്ലെന്ന് പിണറായി വിജയൻ മുന്നറിയിപ്പ് നൽകി. പ്രതിഷേധിക്കാനും അഭിപ്രായം പ്രകടിപ്പിക്കാനുമുള്ള അവകാശം ജനാധിപത്യം പൗരന്മാർക്ക് നൽകുന്ന മൗലികാവകാശമാണെന്നും, സമരങ്ങളെ ഭയപ്പെടാതെ ജനങ്ങളുടെ ശബ്ദം കേൾക്കാൻ തയ്യാറാകുന്ന ഭരണസംവിധാനമാണ് വേണ്ടതെന്നും ചൂണ്ടിക്കാട്ടിയ അദ്ദേഹം, ഇതിനെതിരെ ശക്തമായ ജനകീയ പ്രക്ഷോഭം ഉയർന്നുവരണമെന്നും ആവശ്യപ്പെട്ടു.
എൽഡിഎഫ് ഭരണകാലത്ത് ആശാവർക്കർമാരുടെ പേരിൽ മാസങ്ങളോളം സെക്രട്ടറിയേറ്റിന് മുന്നിൽ സമരം നടന്നപ്പോഴും ആരും പന്തൽ പൊളിക്കാൻ മുതിർന്നിട്ടില്ലെന്ന് പ്രതിപക്ഷ നേതാവ് ഓർമ്മിപ്പിച്ചു. അന്ന് ആ സമരപ്പന്തലിൽ മണിക്കൂറുകളോളം ചെന്നിരുന്ന് അഭിവാദ്യം അർപ്പിക്കുകയും സർക്കാരിനെതിരെ പ്രസംഗിക്കുകയും ചെയ്തവരാണ് ഇപ്പോൾ എൽപിഎസ്ടി സമരത്തെ അറസ്റ്റും പന്തൽ പൊളിക്കലും വഴി തകർക്കാൻ രംഗത്തിറങ്ങിയിരിക്കുന്നതെന്നും പിണറായി വിജയൻ കുറ്റപ്പെടുത്തി.
