തിരുവനന്തപുരം: പൊലീസ് ബലപ്രയോഗത്തിലൂടെ സമരപ്പന്തലിൽ നിന്ന് മാറ്റിയ എൽപിഎസ്ടി ഉദ്യോഗാർത്ഥികളുടെ സമരസമിതി കൺവീനർ എസ്. വളർമതി വീണ്ടും സമരകേന്ദ്രത്തിൽ തിരിച്ചെത്തി. സർക്കാരിന് സമരത്തെ അടിച്ചമർത്താനാകില്ലെന്നും താൻ നിരാഹാര സമരം തുടരുകയാണെന്നും വളർമതി വ്യക്തമാക്കി.
ആരോഗ്യനില മോശമായിരുന്ന തന്നെ ബലമായി പിടിച്ചുകൊണ്ടുപോയി ജനറൽ ആശുപത്രിയിൽ എത്തിച്ചെങ്കിലും രാവിലെ ഏഴര വരെ യാതൊരു ചികിത്സയും നൽകിയില്ലെന്ന് വളർമതി ആരോപിച്ചു. രക്തമോ രക്തസമ്മർദ്ദമോ പോലും പരിശോധിച്ചില്ലെന്നും, സമരകേന്ദ്രത്തിൽ നിന്ന് തന്നെ നീക്കം ചെയ്യാനുള്ള ബോധപൂർവമായ ഇടപെടലാണ് നടന്നതെന്നും അവർ പറഞ്ഞു; സർക്കാരിന് യാതൊരു സാമ്പത്തിക ബാധ്യതയുമില്ലാത്ത ആവശ്യം പോലും നടപ്പാക്കാതെ ഉദ്യോഗാർത്ഥികളെ വഞ്ചിക്കുന്ന നിലപാടിനെതിരെ കടുത്ത പ്രതിഷേധം തുടരുമെന്നും വളർമതി കൂട്ടിച്ചേർത്തു.
അതേസമയം, എൽപിഎസ്ടി റാങ്ക് ഹോൾഡേഴ്സിന് ഐക്യദാർഢ്യം പ്രഖ്യാപിച്ച് എഐവൈഎഫ് പ്രവർത്തകർ പ്രതിഷേധ മാർച്ച് സംഘടിപ്പിച്ചു. സെക്രട്ടറിയേറ്റിന് മുന്നിലേക്ക് നീങ്ങിയ മാർച്ചിന് നേരെ പൊലീസ് ജലപീരങ്കി പ്രയോഗിച്ചു.
