കണ്ണൂർ: പരിയാരം മെഡിക്കൽ കോളേജിൽ രണ്ടര മാസം പ്രായമുള്ള കുഞ്ഞിന്റെ ശസ്ത്രക്രിയയിൽ ഗുരുതര പിഴവ് സംഭവിച്ചതായി പരാതി. കുഞ്ഞിന്റെ പൈലോറസ് പേശിയിലെ തടിപ്പ് പൂർണ്ണമായും നീക്കം ചെയ്യുന്നതിൽ വീഴ്ച വരുത്തിയെന്ന പിതാവ് ജ്യോതിഷിന്റെ പരാതിയിൽ, ആരോഗ്യമന്ത്രിക്ക് നൽകിയ നിവേദനത്തിന്റെ അടിസ്ഥാനത്തിൽ പീഡിയാട്രിക് സർജനെതിരെ അന്വേഷണം ആരംഭിച്ചു.
ശസ്ത്രക്രിയയ്ക്ക് ശേഷം ഡിസ്ചാർജ് ചെയ്ത് വീട്ടിലെത്തിയിട്ടും കുഞ്ഞിന്റെ ആരോഗ്യപ്രശ്നങ്ങൾക്ക് പരിഹാരമായില്ലെന്നും, പാലും രക്തവും ഛർദ്ദിച്ചതിനെ തുടർന്ന് സ്വകാര്യ ആശുപത്രിയിൽ നടത്തിയ പരിശോധനയിലാണ് തടിപ്പ് പൂർണ്ണമായി നീക്കിയിട്ടില്ലെന്ന് വ്യക്തമായതെന്നും കുടുംബം ആരോപിക്കുന്നു. ഇതോടെ പത്ത് ദിവസത്തിനുള്ളിൽ കുഞ്ഞിനെ രണ്ടാമതും ശസ്ത്രക്രിയയ്ക്ക് വിധേയമാക്കേണ്ടി വന്നതായും ജ്യോതിഷ് വ്യക്തമാക്കി.
വയറ്റിലെ തടിപ്പ് കാരണം പാല് കുടലിലേക്ക് ഇറങ്ങാത്ത അവസ്ഥ കണ്ടെത്തിയതിനെ തുടർന്ന് ഒക്ടോബർ 9-നാണ് കുഞ്ഞിനെ മറ്റൊരു ആശുപത്രിയിൽ നിന്ന് പരിയാരം മെഡിക്കൽ കോളേജിലേക്ക് റഫർ ചെയ്തത്. ഒക്ടോബർ 11-ന് ശസ്ത്രക്രിയ പൂർത്തിയാക്കി 18-ന് ഡിസ്ചാർജ് നൽകിയെങ്കിലും, അന്ന് രാത്രി മുതൽ തന്നെ കുഞ്ഞിന് വീണ്ടും അസ്വസ്ഥതകൾ തുടങ്ങുകയും ഛർദ്ദിയിൽ രക്തത്തിന്റെ അംശം കണ്ടതോടെ സ്വകാര്യ ആശുപത്രിയിൽ ചികിത്സ തേടുകയുമായിരുന്നു.
