കൊച്ചി: സ്വകാര്യ ബസ് ഇടിച്ച് ഐടി ജീവനക്കാരി അക്ഷര മരിച്ച കേസിൽ ഡ്രൈവർ ബിനോയിക്കെതിരെ കർശന നടപടിയുമായി പൊലീസ്. ഡ്രൈവറുടെ ഗുരുതരമായ അശ്രദ്ധയാണ് അപകടത്തിന് കാരണമായതെന്ന് വ്യക്തമാക്കിയ ഇൻഫോപാർക്ക് പൊലീസ്, ബിനോയിയുടെ ഡ്രൈവിംഗ് ലൈസൻസ് ആജീവനാന്തം റദ്ദാക്കണമെന്നും അപകടമുണ്ടാക്കിയ ബസിന്റെ പെർമിറ്റ് റദ്ദാക്കണമെന്നും ആവശ്യപ്പെട്ട് മോട്ടോർ വാഹന വകുപ്പിന് കത്ത് നൽകി.
നവംബർ അഞ്ചിന് ജിമ്മിൽ പോയി മടങ്ങുന്നതിനിടെ വീതി കുറഞ്ഞ റോഡിന്റെ അരികുചേർന്ന് നടക്കുകയായിരുന്ന തൃശ്ശൂർ സ്വദേശിനി അക്ഷരയെ (29) അമിതവേഗതയിലെത്തിയ 'മലയിൽ' എന്ന സ്വകാര്യ ബസ് ഇടിച്ചുതെറിപ്പിക്കുകയായിരുന്നു. അപകടസ്ഥലത്തുവെച്ചുതന്നെ അക്ഷര മരണപ്പെടുകയും, പിന്നാലെ ഡ്രൈവർ ബിനോയിയെ പൊലീസ് അറസ്റ്റ് ചെയ്യുകയും ചെയ്തിരുന്നു.
പ്രതിയെക്കുറിച്ച് നടത്തിയ വിശദമായ പരിശോധനയിൽ ബിനോയ് ഏഴോളം ക്രിമിനൽ കേസുകളിൽ പ്രതിയാണെന്ന് പൊലീസ് കണ്ടെത്തിയിട്ടുണ്ട്. തോപ്പുംപടി സ്റ്റേഷനിൽ രണ്ട് വീതം ലഹരിമരുന്ന് കേസുകളും അടിപിടി കേസുകളും, പാലാരിവട്ടം സ്റ്റേഷനിൽ ഒരു ലഹരി കേസും, കൂടാതെ മറ്റൊരു വാഹനാപകട കേസും ഇയാൾക്കെതിരെ നിലവിലുണ്ട്.
