കാസർകോട്: അബൂബക്കർ സിദ്ദിഖി കൊലക്കേസിൽ നാല് വർഷമായി ക്രൈംബ്രാഞ്ച് തിരയുന്ന പ്രതിക്കൊപ്പം കാസർകോട്ടെ യുഡിഎഫ് നേതാക്കൾ നിൽക്കുന്ന ചിത്രം പുറത്തുവന്നു. കേസിലെ പതിമൂന്നാം പ്രതിയായ അഹമ്മദ് റയീസിനൊപ്പം സന്ദീപ് വാര്യർ എംഎൽഎ, എൻ.എ. നെല്ലിക്കുന്ന്, എ.കെ.എം. അഷ്‌റഫ് എന്നിവർ നിൽക്കുന്ന ദൃശ്യങ്ങളാണ് ഇപ്പോൾ പ്രചരിക്കുന്നത്.

ഒരാഴ്ച മുൻപ് ഗൾഫിൽ നടന്ന ഒരു ജ്വല്ലറി ഉദ്ഘാടന ചടങ്ങിനിടെ പകർത്തിയതാണ് ഈ ചിത്രം. അന്വേഷണ സംഘം ലുക്ക് ഔട്ട് നോട്ടീസ് ഉൾപ്പെടെ പുറപ്പെടുവിച്ച് തിരയുന്ന ഒളിവിൽ കഴിയുന്ന പ്രതിക്കൊപ്പമാണ് നേതാക്കൾ പ്രത്യക്ഷപ്പെട്ടത്.

2022 ജൂൺ 26-നാണ് ദുബായിലേക്കുള്ള ഡോളർ കടത്തുമായി ബന്ധപ്പെട്ട തർക്കത്തെ തുടർന്ന് ഉപ്പളയിൽ വെച്ച് ക്വട്ടേഷൻ സംഘം അബൂബക്കർ സിദ്ദിഖിയെ തട്ടിക്കൊണ്ടുപോയി കൊലപ്പെടുത്തിയത്. സംഭവത്തിന് പിന്നാലെ ഒളിവിൽ പോയ അഹമ്മദ് റയീസിനെ കണ്ടെത്താൻ സംസ്ഥാന ക്രൈംബ്രാഞ്ച് അന്വേഷണം തുടരുന്നതിനിടെയാണ് പുതിയ ചിത്രം വിവാദമായിരിക്കുന്നത്.