തിരുവനന്തപുരം: ഗ്യാനേഷ് കുമാറിനെ സംരക്ഷിക്കാൻ പ്രധാനമന്ത്രി നരേന്ദ്ര മോദിക്കും അമിത് ഷായ്ക്കും കഴിയില്ലെന്നും രാഹുൽ ഗാന്ധിയുടെ നേതൃത്വത്തിൽ നടക്കുന്ന പ്രക്ഷോഭം അന്തിമ വിജയത്തിലെത്തുമെന്നും മന്ത്രി ഒ.ജെ. ജനീഷ്. രാഹുൽ ഗാന്ധിയുടെ പോരാട്ടത്തിന് ഐക്യദാർഢ്യം പ്രഖ്യാപിച്ച് സംസ്ഥാനത്തെ 14 ജില്ലാ കേന്ദ്രങ്ങളിലും യൂത്ത് കോൺഗ്രസ് സംഘടിപ്പിക്കുന്ന പദയാത്രയ്ക്ക് തിരുവനന്തപുരത്ത് തുടക്കം കുറിക്കവെ സംസാരിക്കുകയായിരുന്നു അദ്ദേഹം.
സർക്കാരിനെ തിരഞ്ഞെടുക്കുന്ന പൗരന്മാർ ആരായിരിക്കണമെന്ന് ഭരണകൂടം തീരുമാനിക്കുന്ന തരത്തിൽ ജനങ്ങളുടെ വോട്ടവകാശം കവർന്നെടുക്കുന്ന സമീപനമാണ് നരേന്ദ്ര മോദി സർക്കാരിന്റേതെന്ന് മന്ത്രി ആരോപിച്ചു. കേരളത്തിൽ ആയിരക്കണക്കിന് ചെറുപ്പക്കാർ അണിനിരക്കുന്ന യൂത്ത് കോൺഗ്രസ് പദയാത്രയ്ക്ക് സമാനമായ ഒരു സമരപരിപാടിയും ഇടതുപക്ഷത്തിന്റെ ഭാഗത്തുനിന്ന് കാണുന്നില്ലെന്നും, 2029 വരെ നരേന്ദ്ര മോദിക്ക് അധികാരത്തിൽ തുടരാനാകുമോയെന്നത് സംശയമാണെന്നും 2029-ൽ ജനാധിപത്യ സർക്കാർ അധികാരത്തിൽ വരുമെന്നും അദ്ദേഹം പറഞ്ഞു.
രാജ്യതലസ്ഥാനത്തെ പ്രക്ഷോഭങ്ങളിൽ ഇടതുപക്ഷ സംഘടനകൾ ഒപ്പമുണ്ടെങ്കിലും കേരളത്തിൽ അവർ ആ ദൗത്യം നിർവഹിക്കുന്നുണ്ടോ എന്ന് സംശയമാണെന്ന് ജനീഷ് വിമർശിച്ചു. മുൻപ് തിരുവനന്തപുരത്ത് റെസിസ്റ്റൻസ് മാർച്ച് നടന്നപ്പോൾ ബിജെപിക്കും യുവമോർച്ചയ്ക്കും വേണ്ടി അക്രമത്തിന് നേതൃത്വം നൽകിയത് എസ്.എഫ്.ഐയും ഡി.വൈ.എഫ്.ഐയും ആയിരുന്നുവെന്നും, അമിത് ഷാ കേരളത്തിലെത്തിയപ്പോൾ കരിങ്കൊടി കാണിക്കാൻ ഇടതുസംഘടനകൾ തയ്യാറായില്ലെന്നും അദ്ദേഹം കുറ്റപ്പെടുത്തി.
കണ്ണൂർ ജില്ലയിൽ തനിക്കെതിരെ കരിങ്കൊടി കാണിച്ചപ്പോൾ ബിജെപിയെയും എസ്.എഫ്.ഐയെയും തിരിച്ചറിയാൻ കഴിയാത്ത വിധം ഇരുവിഭാഗവും ഒരുമിച്ചുനിന്നാണ് യൂത്ത് കോൺഗ്രസിനെതിരെ പ്രചാരണം നടത്തിയത്. മന്ത്രിസഭയുടേത് കൂട്ടുത്തരവാദിത്വമാണെന്നും പാർട്ടിക്കുള്ളിലെ അതൃപ്തികളെക്കുറിച്ച് നേതൃത്വം വിശദീകരിക്കുമെന്നും വ്യക്തമാക്കിയ അദ്ദേഹം, നിലവിൽ ഈ സമരപ്രഖ്യാപനത്തെക്കുറിച്ച് മാത്രമാണ് സംസാരിക്കാൻ സാധിക്കുകയെന്നും കൂട്ടിച്ചേർത്തു.
