തിരുവനന്തപുരം: കേരള ചരിത്ര ഗവേഷണ കൗൺസിൽ (കെസിഎച്ച്ആർ) ചെയർപേഴ്‌സണായി ഡോ. വിനോദ് കുമാർ കല്ലോലിക്കലിനെ നിയമിച്ചത് പൂർണ്ണമായും മെറിറ്റിന്റെ അടിസ്ഥാനത്തിലാണെന്ന് ഉന്നത വിദ്യാഭ്യാസ മന്ത്രി റോജി എം. ജോൺ വ്യക്തമാക്കി. യോഗ്യതയുള്ളവരെ 'സംഘിയാക്കാനുള്ള' ശ്രമം പ്രതിപക്ഷം അവസാനിപ്പിക്കണമെന്നും, വകുപ്പിന് ഇക്കാര്യത്തിൽ യാതൊരു സ്ഥാപിത താൽപ്പര്യങ്ങളുമില്ലെന്നും ഫേസ്ബുക്ക് കുറിപ്പിലൂടെ മന്ത്രി പ്രതികരിച്ചു.
വിനോദ് കുമാറിന്റെ നിയമനത്തിനെതിരായ ആരോപണങ്ങൾ വസ്തുതാവിരുദ്ധമാണെന്ന് ചൂണ്ടിക്കാട്ടിയ റോജി എം. ജോൺ, രാഷ്ട്രീയമായി അനഭിമതരായവരെ 'സംഘിച്ചാപ്പയടിക്കുന്ന' സി.പി.ഐ.എം രീതി അവസാനിപ്പിക്കണമെന്നും ആവശ്യപ്പെട്ടു. ഇടത് അധ്യാപക സംഘടനയിൽ സജീവമായി പ്രവർത്തിച്ചിരുന്ന കാലത്ത് വിനോദ് കുമാറിന് സംഘപരിവാർ ബന്ധം ആരോപിക്കാതിരുന്നവർ ഇപ്പോൾ അദ്ദേഹത്തിനെതിരെ രംഗത്തുവരുന്നത് എന്തുകൊണ്ടാണെന്നും മന്ത്രി ചോദ്യമുയർത്തി.
ചെയർപേഴ്‌സൺ നിയമനം യുഡിഎഫ് സർക്കാർ അട്ടിമറിച്ചുവെന്നും, ഡോ. വിനോദ് കുമാർ കല്ലോലിക്കലിനെ നിയമിച്ചത് കാവിവൽക്കരണ അജണ്ടയുടെ ഭാഗമാണെന്നും പ്രതിപക്ഷ നേതാവ് പിണറായി വിജയൻ നേരത്തെ ആരോപിച്ചിരുന്നു; ഇതിനുള്ള മറുപടിയായാണ് ഉന്നത വിദ്യാഭ്യാസ മന്ത്രിയുടെ പ്രതികരണം.
