തിരുവനന്തപുരം: പൊലീസ് പൊളിച്ചുനീക്കിയ എൽപിഎസ്ടി ഉദ്യോഗാർത്ഥികളുടെ സമരപ്പന്തൽ ഒരു മണിക്കൂർ തികയുന്നതിന് മുൻപ് തന്നെ ഡിവൈഎഫ്ഐ പ്രവർത്തകർ പുനഃസ്ഥാപിച്ചു. സമരനേതാവ് വളർമതിയെ ബലപ്രയോഗത്തിലൂടെ ആശുപത്രിയിലേക്ക് മാറ്റിയതിന് പിന്നാലെയുണ്ടായ പൊലീസ് നടപടിക്കെതിരെ പ്രതിഷേധിച്ചാണ് പന്തൽ വീണ്ടും കെട്ടിയത്; ഇതിന് പിന്നാലെ ഉദ്യോഗാർത്ഥിയായ ജയകൃഷ്ണൻ നിരാഹാര സമരം പുനരാരംഭിച്ചു.
ദിവസവും സമരക്കാർക്ക് ഐക്യദാർഢ്യവുമായി എത്തുന്ന ഡിവൈഎഫ്ഐ പ്രവർത്തകർ മടങ്ങിപ്പോയെന്ന് ഉറപ്പാക്കിയ ശേഷമായിരുന്നു രാത്രിയിലെ അപ്രതീക്ഷിത പൊലീസ് നീക്കം. സ്ഥലത്തെത്തിയ പൊലീസ് സംഘം വളർമതിയെ ബലമായി ആശുപത്രിയിലേക്ക് മാറ്റിയ ശേഷം സമരപ്പന്തലും ഫ്ളക്സ് ബോർഡുകളും പോസ്റ്ററുകളും പൂർണ്ണമായി നീക്കം ചെയ്തിരുന്നു.
24 മണിക്കൂറിനകം സമരപ്പന്തൽ പൊളിച്ചുമാറ്റണമെന്നും അല്ലാത്തപക്ഷം നിയമനടപടി സ്വീകരിക്കുമെന്നും കാണിച്ച് പൊലീസ് നേരത്തെ രണ്ട് തവണ സമരക്കാർക്ക് നോട്ടീസ് നൽകിയിരുന്നു.
