കൊച്ചി: സമൂഹമാധ്യമങ്ങളിലെ വാർത്താ ഉള്ളടക്കങ്ങൾ നീക്കം ചെയ്യാൻ സർക്കാർ ഇടപെട്ടിട്ടില്ലെന്ന മുഖ്യമന്ത്രി വി.ഡി. സതീശന്റെ വാദം തള്ളി സംസ്ഥാന സർക്കാർ ഹൈക്കോടതിയിൽ സത്യവാങ്മൂലം നൽകി. വിദ്വേഷ കമന്റുകൾ നീക്കം ചെയ്യാൻ മെറ്റ പ്ലാറ്റ്ഫോമിന് നിർദേശം നൽകിയിരുന്നുവെന്ന് സർക്കാർ കോടതിയെ ഔദ്യോഗികമായി അറിയിച്ചു. 'നോ ക്യാപ്' എന്ന സമൂഹമാധ്യമ അക്കൗണ്ട് സമർപ്പിച്ച ഹർജിയിലാണ് സർക്കാരിന്റെ ഈ നിർണ്ണായക വെളിപ്പെടുത്തൽ.
വിദ്വേഷം പ്രചരിപ്പിക്കുന്ന ചില കമന്റുകൾ ഒഴിവാക്കാൻ മാത്രമാണ് മെറ്റയോട് ആവശ്യപ്പെട്ടതെന്നും, ഫേസ്ബുക്ക് പേജ് പൂർണ്ണമായി നീക്കം ചെയ്യാൻ നിർദേശിച്ചിട്ടില്ലെന്നും സർക്കാർ സത്യവാങ്മൂലത്തിൽ വ്യക്തമാക്കി. സെപ്റ്റംബർ 28-ന് ഇന്ത്യയിൽ നിയന്ത്രണം ഏർപ്പെടുത്തിയ നോ ക്യാപിന്റെ ഫേസ്ബുക്ക് പേജ്, ചീഫ് എഡിറ്റർ ഹൈദർ അലി നൽകിയ അപ്പീലിൽ ഹൈക്കോടതി ഉത്തരവിനെ തുടർന്നാണ് പിന്നീട് പുനഃസ്ഥാപിച്ചത്; പേജിലെ ഉള്ളടക്കത്തിന് താഴെ വന്ന ചില കമന്റുകൾ നീക്കം ചെയ്ത ശേഷം പ്രവർത്തനം തുടരാനായിരുന്നു കോടതി നിർദേശം.
യുഡിഎഫ് സർക്കാർ അധികാരത്തിൽ വന്നതിന് പിന്നാലെ സർക്കാരിനെയും മുഖ്യമന്ത്രി വി.ഡി. സതീശനെയും വിമർശിക്കുന്നതും മുഖ്യമന്ത്രിയുടെ ചിത്രം ഉൾപ്പെടുന്നതുമായ നിരവധി വാർത്താ കാർഡുകൾ മെറ്റ നീക്കം ചെയ്തിരുന്നു. വാർത്തകൾ പിൻവലിക്കാൻ സർക്കാർ ആവശ്യപ്പെട്ടിട്ടില്ലെന്നും അത് സാങ്കേതിക പിഴവായിരിക്കാമെന്നുമായിരുന്നു മുഖ്യമന്ത്രി നേരത്തെ അവകാശപ്പെട്ടിരുന്നത്.
