തിരുവനന്തപുരം: ശ്രീകാര്യത്ത് അഭിറാം എന്ന യുവാവ് കൊല്ലപ്പെട്ട സംഭവത്തിൽ രണ്ടാം പ്രതി ഉമറിന്റെ പങ്കാളിത്തം സ്ഥിരീകരിച്ച് അന്വേഷണ സംഘം. തനിക്ക് കൃത്യത്തിൽ പങ്കില്ലെന്ന ഉമറിന്റെ വാദങ്ങൾ തള്ളിയ പോലീസ്, കൊലപാതകം നടന്ന സ്ഥലത്ത് ഇയാൾ നേരിട്ടെത്തിയിരുന്നതായി വ്യക്തമാക്കുന്ന തെളിവുകൾ ശേഖരിച്ചു. കൃത്യത്തിന് മുൻപും ശേഷവും പഴുതടച്ച ആസൂത്രണമാണ് പ്രതികൾ നടത്തിയത്.
കൊലപാതകം നടക്കുമ്പോൾ വീട്ടിലുണ്ടായിരുന്നു എന്ന് വരുത്തിത്തീർക്കാൻ സ്വന്തം ഫോൺ വീട്ടിൽ വെയ്ക്കുകയും, സിസിടിവിയിൽ മുഖം പതിയുന്ന രീതിയിൽ നടക്കുകയും ചെയ്ത ശേഷമാണ് ഉമർ സംഭവസ്ഥലത്തേക്ക് പോയത്. ഒന്നാം പ്രതിയായ 17-കാരൻ മാത്രമാണ് കുറ്റക്കാരനെന്ന് വരുത്താൻ ഇയാൾ കാമുകിക്ക് നിരന്തരം മെസ്സേജുകൾ അയച്ചിരുന്നു. മോഷണക്കേസുകളിൽ മുൻപരിചയമുള്ളതിനാൽ ഇരുവരും ചേർന്ന് അഭിറാമിന്റെ ഫോൺ, ഷൂസ്, കൊലപ്പെടുത്താൻ ഉപയോഗിച്ച ബെൽറ്റ് തുടങ്ങിയ പ്രധാന തെളിവുകൾ സമർത്ഥമായി ഒളിപ്പിക്കുകയോ നശിപ്പിക്കുകയോ ചെയ്തിട്ടുണ്ട്.
ചോദ്യം ചെയ്യലിനോട് ഉമർ സഹകരിക്കാത്ത സാഹചര്യത്തിൽ, ജുഡീഷ്യൽ കസ്റ്റഡിയിലുള്ള 17-കാരനെ മൂന്ന് ദിവസത്തേക്ക് കസ്റ്റഡിയിൽ വാങ്ങാനാണ് അന്വേഷണ സംഘത്തിന്റെ നീക്കം. കൊല്ലപ്പെട്ട അഭിറാമിന്റെ മൊബൈൽ ഫോണിന്റെ അവസാന ടവർ ലൊക്കേഷൻ മൺവിളയിലാണെന്ന് കണ്ടെത്തിയതിനാൽ, സംഭവം നടന്ന സ്ഥലത്ത് കൂടുതൽ തെരച്ചിൽ നടത്തി ഒളിപ്പിച്ച തൊണ്ടിമുതലുകൾ വീണ്ടെടുക്കാനാണ് പോലീസ് ലക്ഷ്യമിടുന്നത്.
