തിരുവനന്തപുരം: കോവളം സ്പാ പീഡനക്കേസിൽ ആരോപണവിധേയനായ നഗരസഭാ ഹെൽത്ത് ഇൻസ്പെക്ടർ എം.ഒ. അനുരൂപിനെ സർവീസിൽ നിന്ന് പിരിച്ചുവിടണമെന്ന് ആവശ്യപ്പെട്ട് തിരുവനന്തപുരം കോർപ്പറേഷൻ സർക്കാരിന് കത്ത് നൽകി. ഇയാൾ നഗരസഭയ്ക്ക് കടുത്ത അപമാനമുണ്ടാക്കിയെന്ന് ചൂണ്ടിക്കാട്ടി കൗൺസിൽ ഐകകണ്ഠ്യേന കൈക്കൊണ്ട തീരുമാനത്തിന്റെ അടിസ്ഥാനത്തിൽ തദ്ദേശ സ്വയംഭരണ വകുപ്പ് സെക്രട്ടറിക്കാണ് കത്ത് കൈമാറിയത്.
പീഡനം നടന്ന 'ഡ്രീം' എന്ന സ്പാ അനുരൂപിന്റെ ബിനാമി സംരംഭമാണെന്ന് അന്വേഷണ സംഘം നേരത്തെ കണ്ടെത്തിയിരുന്നു. സംഭവത്തിൽ പ്രതിയായ അനുരൂപിനെ നിലവിൽ സസ്പെൻഡ് ചെയ്തതായി മേയർ അറിയിച്ചു. അറസ്റ്റിലായ നിശാന്തിന്റെ പേരിലുള്ള വാടകക്കരാറിലാണ് സ്പാ പ്രവർത്തിച്ചിരുന്നതെങ്കിലും, സ്ഥാപനത്തിൽ നിന്ന് പ്രതിദിനം ലഭിച്ചിരുന്ന 25,000 രൂപ വരെയുള്ള വരുമാനം പൂർണ്ണമായും കൈപ്പറ്റിയിരുന്നത് അനുരൂപാണ്.
സ്പായുടെ പ്രവർത്തനം മൂന്ന് മാസം മുൻപാണ് തുടങ്ങിയതെന്നാണ് അനുരൂപ് നൽകിയ മൊഴിയെങ്കിലും, ഇയാൾക്ക് നിശാന്തുമായി ദീർഘകാലത്തെ മുൻപരിചയമുണ്ടെന്ന് പോലീസ് സ്ഥിരീകരിച്ചിട്ടുണ്ട്.
