സംസ്ഥാനത്തെ വൈദ്യുതി വാങ്ങൽ കരാറുകളുമായി ബന്ധപ്പെട്ട സുപ്രധാന തീരുമാനങ്ങളിലും മുൻ കെഎസ്ഇബി ചെയർമാൻ എം.ജി. രാജമാണിക്യത്തെ മാറ്റിയ നടപടിയിലും മന്ത്രി സണ്ണി ജോസഫ് കടുത്ത അതൃപ്തി പ്രകടിപ്പിച്ചു. വൈദ്യുതി പ്രതിസന്ധി റിപ്പോർട്ടിൽ അന്വേഷണം പ്രഖ്യാപിച്ചതും മഹാരാഷ്ട്രയിലെ സിന്നാർ താപനിലയത്തിൽ നിന്ന് വൈദ്യുതി വാങ്ങാനുള്ള നീക്കവും തന്നെ മുൻകൂട്ടി അറിയിച്ചില്ലെന്നും കാര്യങ്ങൾ മനസ്സിലാക്കിയത് മാധ്യമങ്ങളിലൂടെയാണെന്നും അദ്ദേഹം വ്യക്തമാക്കി.
ഹിമാചലിൽ നിന്നും ജിഎൻഎ പ്രൈവറ്റ് ലിമിറ്റഡിൽ നിന്നും വൈദ്യുതി വാങ്ങുന്നതുമായി ബന്ധപ്പെട്ട രണ്ടാഴ്ച നീണ്ട വിവാദങ്ങൾക്കൊടുവിൽ, രണ്ടിടത്തുനിന്നും വൈദ്യുതി വാങ്ങേണ്ടതില്ലെന്ന് മുഖ്യമന്ത്രി വി.ഡി. സതീശൻ പ്രഖ്യാപിച്ചിരുന്നു. എന്നാൽ ഇതിനുപിന്നാലെയാണ് കെപിസിസി അധ്യക്ഷൻ കൂടിയായ വൈദ്യുതി മന്ത്രി തന്നെ തഴഞ്ഞതിലുള്ള നീരസം തുറന്നുപറഞ്ഞത്. കാര്യങ്ങൾ മാധ്യമങ്ങളിലൂടെയാണ് അറിയുന്നതെന്ന് യുഡിഎഫ് കൺവീനറും നേരത്തെ വ്യക്തമാക്കിയിരുന്നു.
നവംബർ, ഡിസംബർ മാസങ്ങളിൽ രൂക്ഷമായ വൈദ്യുതി ക്ഷാമമുണ്ടാകുമെന്നും ഹിമാചലിൽ നിന്ന് വൈദ്യുതി വാങ്ങണമെന്നും കാട്ടി രാജമാണിക്യം മുഖ്യമന്ത്രിക്ക് റിപ്പോർട്ട് നൽകിയതിന് പിന്നാലെയാണ് അതിന്മേൽ അന്വേഷണം പ്രഖ്യാപിച്ചത്. ഈ റിപ്പോർട്ടിന് പിന്നിൽ നിക്ഷിപ്ത താത്പര്യങ്ങളുണ്ടെന്ന ആരോപണം ഉയരവെ, കെഎസ്ഇബിയെയും വകുപ്പ് മന്ത്രിയെയും സംശയനിഴലിലാക്കുന്ന നിലപാടുകളാണ് ഉണ്ടായതെന്ന ആക്ഷേപവും ശക്തമാണ്.
