കൊച്ചി: കാലടി സംസ്കൃത സർവകലാശാലയിൽ സസ്പെൻഷൻ നടപടി നേരിട്ട വിദ്യാർത്ഥികൾ സമർപ്പിച്ച പുതിയ ഭേദഗതി ഹർജി കേരള ഹൈക്കോടതി സിംഗിൾ ബെഞ്ച് നാളെ പരിഗണിക്കും. കേസ് വേഗത്തിൽ പരിഗണിക്കണമെന്ന് സുപ്രീം കോടതി നിർദ്ദേശിച്ചിട്ടുള്ളതിനാൽ ഈ ആഴ്ച തന്നെ വിശദമായ വാദം കേൾക്കാമെന്ന് സിംഗിൾ ബെഞ്ച് വ്യക്തമാക്കി.
വിദ്യാർത്ഥികൾക്ക് പരീക്ഷ എഴുതാൻ അനുമതി നൽകിയ സിംഗിൾ ബെഞ്ചിന്റെ മുൻ ഉത്തരവ് ഡിവിഷൻ ബെഞ്ച് റദ്ദാക്കിയിരുന്നു; ഇതിനെത്തുടർന്ന് സുപ്രീം കോടതിയെ സമീപിച്ച ശേഷമാണ് നിർദ്ദേശപ്രകാരം വിദ്യാർത്ഥികൾ വീണ്ടും ഹൈക്കോടതിയിലെത്തിയത്. തങ്ങളിൽ പലർക്കും പരീക്ഷ എഴുതാൻ ആവശ്യമായ 60 ശതമാനം ഹാജരുണ്ടെന്നും ശേഷിക്കുന്ന 20 ശതമാനം ഇളവ് നൽകാൻ വൈസ് ചാൻസലർക്ക് അധികാരമുണ്ടെന്നും വിദ്യാർത്ഥികൾ ഹർജിയിൽ ചൂണ്ടിക്കാട്ടുന്നു.
ക്യാമ്പസിൽ പ്രവേശിക്കുന്നതിന് വിലക്കുള്ളതിനാലാണ് ഹാജർ ഇളവിനായുള്ള അപേക്ഷ സമർപ്പിക്കാൻ സാധിക്കാതെ പോയതെന്ന് വിദ്യാർത്ഥികൾ ബോധിപ്പിച്ചു. വൈസ് ചാൻസലറെ ആക്രമിച്ചുവെന്നും പ്രതീകാത്മക ശവസംസ്കാരം നടത്തിയെന്നുമുള്ള ആരോപണങ്ങൾ അടിസ്ഥാനരഹിതമായ കള്ളക്കേസാണെന്നും ഹർജിയിൽ വ്യക്തമാക്കുന്നുണ്ട്.
