കണ്ണൂർ: റവന്യൂ മന്ത്രിയുടെ സ്റ്റാഫ് സെക്രട്ടറിമാരിൽ തലശ്ശേരി അതിരൂപത നിർദ്ദേശിച്ച വ്യക്തിയെ ഉൾപ്പെടുത്തിയതിന് മന്ത്രിയോട് വേദിയിൽ പരസ്യമായി നന്ദി രേഖപ്പെടുത്തി ആർച്ച് ബിഷപ്പ് മാർ ജോസഫ് പാംപ്ലാനി. മന്ത്രിയെ വേദിയിലിരുത്തി സംസാരിക്കവെയാണ് നൽകിയ വാക്ക് അദ്ദേഹം പൂർണ്ണമായി പാലിച്ചുവെന്ന് ബിഷപ്പ് വ്യക്തമാക്കിയത്.
നാട്ടിലെ ഭൂമി പ്രശ്നങ്ങളിൽ ക്രിയാത്മകമായി ഇടപെടാൻ സഭയ്ക്ക് ഇപ്പോൾ സാധിക്കുന്നുണ്ടെന്ന് മാർ ജോസഫ് പാംപ്ലാനി ചൂണ്ടിക്കാട്ടി. മെത്രാന്മാർ നേരത്തെ മന്ത്രിയെ നേരിൽക്കണ്ട് പ്രാദേശിക ഭൂപ്രശ്നങ്ങൾ കൈകാര്യം ചെയ്യാൻ തങ്ങളുടെ ഭാഗത്തുനിന്നൊരാളെ സ്റ്റാഫിലേക്ക് പരിഗണിക്കണമെന്ന് ആവശ്യപ്പെടുകയായിരുന്നു.
റവന്യൂ വകുപ്പിൽ പ്രവർത്തിക്കുന്ന, സഭയ്ക്ക് സ്വീകാര്യനായ ആരെയും ശുപാർശ ചെയ്യാൻ മന്ത്രി അന്ന് നിർദ്ദേശിച്ചിരുന്നു. ഭംഗിവാക്ക് പറഞ്ഞതാണെന്ന് ആദ്യം കരുതിയെങ്കിലും പറഞ്ഞ ഉറപ്പ് മന്ത്രി അക്ഷരംപ്രതി നടപ്പിലാക്കിയെന്ന് ആർച്ച് ബിഷപ്പ് കൂട്ടിച്ചേർത്തു.
